ಕತ್ತಲೆಯ ದಾರಿ!

ಕತ್ತಲೆಯ ದಾರಿ!

ತಳಮಳಿಸಿ, ಹಳಹಳಿಸಿ
ಒಳ ಒಳಗೆಳೆದುಕೊಂಡು
ಸುತ್ತೊ ಯಂತ್ರದಂತೆ
ಹೊರ ಬಿಡುವ ಬಿಸಿಯುಸಿರಿಗೆ
ನಾಳೆಯ ನೂರು ಚಿಂತೆಗಳ ಬೆಂಕಿ!

ಎಲ್ಲೆ ಮೀರಿ ತಿರು ತಿರುಗಿದರೂ
ಎಲ್ಲ ಸವೆ ಸವೆಸಿದರೂ
ಹೆಣ ಬಾರವೆಲ್ಲ ಹೊದ್ದರೂ
ಮೆಟ್ಟಬಾರದ್ದನ್ನೆಲ್ಲ ಗೆದ್ದರೂ
ಚರ್ಮದ ಚೀಲದಲಿ ಆರದ ಆವಿ!

ಕೋಟಿ ಕೋಡಿಗಳ ಹಾಯ್ದರೂ
ಕೆಂಡದುಂಡೆಗಳ ಮೆದ್ದರೂ
ಎದೆ ಏರಿಸಿ ಗಾಣ ತಿರುಗಿಸಿದರೂ
ನೂರು ಬಾಣಗಳ ಮೆಟ್ಟಿ ಎಸೆದರೂ
ಮುಟ್ಟಲಾಗದು ಬೇಡಿಕೆಯ ಪರಿ!

ನರ ನರಗಳ ನಾಡಿಯನರಿಯದೆ
ದಿಕ್ಕು ದಿಕ್ಕಿಗೂ ಹಣಿಕಿ ಹಾಕುತ್ತ
ಬೇಯುತ್ತ, ಕಣ್ಣ ಹನಿ ಜಿನುಗಿಸುತ್ತ
ಎಲ್ಲಿಂದೆಲ್ಲಿಗೋ ಪಯಣ!

ಕತ್ತಲೆಯ ದಾರಿ! ಹೆಡ್ ಲೈಟಿಲ್ಲದ ಪಯಣ!
ಕಂಡರೂ ಕಾಣದೀ ಮುಗಿಯದ ಹಾದಿ!

ವೀರಣ್ಣ ಕಮ್ಮಾರ
* * *