‘News of the world’: ಕೊಲೆಯೋ? ಆತ್ಮಹತ್ಯೆಯೋ?

ಜುಲೈ 15, 2011

’ನ್ಯೂಸ್ ಆಫ್ ದಿ ವರ್ಲ್ಡ್’ನ ಕೊಲೆಯೋ? ಆತ್ಮಹತ್ಯೆಯೋ?

-ವೀರಣ್ಣ ಕಮ್ಮಾರ

ಆಕೆ ೧೩ ವರ್ಷದ ಬಾಲಕಿ. ಹೆಸರು ಮಿಲಿ ಡಾವ್ಲರ್ ಎಂದು. ೨೦೦೨ರ ಮಾರ್ಚ್ ೨೧ರಂದು ಇಂಗ್ಲೆಂಡ್‌ನ ಸರ್ರೆ ಎಂಬಲ್ಲಿನ ’ವಾಲ್ಟನ್ ಆನ್ ಥೇಮ್ಸ್’ನಲ್ಲಿನ ತನ್ನ ಶಾಲೆಯಿಂದ ಮನೆಗೆ ಮರಳುವಾಗ ಆಕೆಯನ್ನು ಲೆವಿ ಬೆಲ್‌ಫೀಲ್ಡ್ ಎಂಬ ಕಾಮಾಂಧನೊಬ್ಬ ಅಪಹರಿಸಿದನು. ನಂತರ ೨೦೦೨ರ ಸೆಪ್ಟೆಂಬರ್ ೧೮ರಂದು ಇಂಗ್ಲೆಂಡ್‌ನ ಯಾಟೆಲೆ ಎಂಬಲ್ಲಿ ಆಕೆಯ ಹೆಣದ ಅವಶೇಷಗಳು ಸಿಕ್ಕವು. ಆಕೆಯನ್ನು ಅಪಹರಿಸಿದ ಲೆವಿ ಬೆಲ್‌ಫೀಲ್ಡ್, ಕೊಲೆ ಮಾಡಿ ಪರಾರಿಯಾಗಿದ್ದ. ಹೆಣದ ಬಳಿ ಯಾವುದೇ ಬಟ್ಟೆಯಾಗಲೀ, ಪರಿಕರಗಳಾಗಲೀ ಸಿಗಲಿಲ್ಲ. ಹೆಣವನ್ನು ಹೂತಿರಲಿಲ್ಲ. ಸಿಕ್ಕಾಗ ಅದು ಕೊಳೆತು ಹೋಗಿತ್ತು. ಡಿಎನ್‌ಎ ಪರೀಕ್ಷೆಯಿಂದ ಅದು ಮಿಲಿ ಡಾವ್ಲರ್‌ಳ ಹೆಣವೆಂಬುದು ಖಚಿತವಾಯಿತು.
ಇದು ನೊಯ್ಡಾದ ಆರುಷಿ ತಲ್ವಾರ್ ಹಾಗೂ ಹೇಮರಾಜ್ ಜೋಡಿ ಕೊಲೆ ಪ್ರಕರಣದಂತೆ ಇತ್ತು. ಮಿಲಿ ಡಾವ್ಲರ್‌ಳ ಅಪಹರಣದ ವಿಚಾರ ಬಹಿರಂಗ ಆಗುತ್ತಿದ್ದಂತೇ ಬ್ರಿಟನ್ ಪೊಲೀಸರು ಸುಮ್ಮನೇ ಕೂರಲಿಲ್ಲ. ೧೦೦ ಜನ ಪೊಲೀಸರ ತಂಡ ಎಲ್ಲೆಲ್ಲಿ ಸಾಧ್ಯವೋ ಅಲ್ಲೆಲ್ಲ ಹುಡುಕಿತು. ಹೆಲಿಕಾಪ್ಟರ್‌ರ ಸಹಾಯ ಪಡೆಯಲಾಯಿತು. ಕಾಡಿನಲ್ಲಿ, ನೀರಿನಲ್ಲಿ, ನಗರದ ಸಂದಿಗೊಂದಿಗಳಲ್ಲೆಲ್ಲಾ ಹುಡುಕಲಾಯಿತು. ಆಕೆಯ ಹುಡುಕಾಟ ಆಂಧ್ರದ ವೈ.ಎಸ್.ಆರ್.ರೆಡ್ಡಿ ಹೆಲಿಕಾಪ್ಟರ್ ಹುಡುಕಾಟ ನೆನಪಿಸುವಂತಿತ್ತು. ಆದರೂ, ಏಳು ತಿಂಗಳ ಕಾಲ ಆಕೆಯ ಬಗ್ಗೆ ಯಾವುದೇ ಸುಳಿವು ಸಿಗಲಿಲ್ಲ.
ಆದರೆ, ಬ್ರಿಟನ್‌ನಲ್ಲಿರುವ ’ನ್ಯೂಸ್ ಆಫ್ ದಿ ವರ್ಲ್ಡ್’ ಎಂಬ ಪತ್ರಿಕೆಯ ಸಂಪಾದಕ ಬಳಗದವರು, ವರದಿಗಾರರು ಸುಮ್ಮನೇ ಕೂರಲಿಲ್ಲ. ತಮ್ಮ ವರದಿಗಾರರನ್ನು ವೇಷ ಮರೆಸಿ, ಎಲ್ಲೆಂದರಲ್ಲಿ ಕಳುಹಿಸಿ, ಅತಿ ಖಾಸಗಿಯಾದ ಮಾಹಿತಿಗಳನ್ನೂ ಪಡೆದು, ಪ್ರಕಟಿಸುವಲ್ಲಿ ಮುಂಚೂಣಿಯಲ್ಲಿದ್ದ ಪತ್ರಿಕೆಯು, ಮಿಲಿ ಡಾವ್ಲರ್‌ಳ ಬೆನ್ನು ಹತ್ತಿತು. ಆಕೆಯ ಮೊಬೈಲ್ ಫೋನ್‌ಗೇ ’ಕನ್ನ’ ಹಾಕಿದರು. ಅಂದರೆ ಅದನ್ನು ಹ್ಯಾಕ್ ಮಾಡಿದರು. ಹೀಗೆ ಫೋನ್ ಹ್ಯಾಕ್ ಮಾಡಲು ಖಾಸಗಿ ಗೂಢಚರ ಏಜೆನ್ಸಿಯೊಂದನ್ನು ನೇಮಿಸಿಕೊಂಡಿದ್ದರು. ಆ ಏಜೆನ್ಸಿಯ ಖಾಸಗಿ ಗೂಢಚರ್ಯನಾದ ಗ್ಲೆನ್ ಮುಲ್‌ಕೇರ್ ಎಂಬಾತನು ’ನ್ಯೂಸ್ ಆಫ್ ದಿ ವರ್ಲ್ಡ್’ಗಾಗಿ ಮಿಲಿಯಳ ಫೋನ್‌ನ ಇನ್‌ಬಾಕ್ಸ್‌ಗೆ ಹ್ಯಾಕ್ ಮಾಡಿದನು. ಆಕೆಯ ಫೋನ್‌ನಲ್ಲಿದ್ದ ವಿಡಿಯೊ ಕ್ಲಿಪಿಂಗ್‌ಗಳು, ಎಸ್‌ಎಂಎಸ್‌ಗಳನ್ನು ಪತ್ರಿಕೆಗೆ ವರ್ಗಾವಣೆ ಮಾಡಿದನು. ಅವುಗಳನ್ನು ಪತ್ರಿಕೆಯವರು ಗುಟ್ಟಾಗಿ ನೋಡಿದ್ದಲ್ಲದೇ ಆ ಮಾಹಿತಿ ಬಳಸಿಕೊಂಡು, ಮಿಲಿಯನ್ನು ಅಪಹರಿಸಲಾಗಿದೆ ಎಂಬರ್ಥ ಬರುವಂತೆ ವರದಿ ಪ್ರಕಟಿಸಿತು ಜೊತೆಗೆ, ಹೊಸ ಮೆಸೇಜ್‌ಗಳಿಗೆ ಅವಕಾಶ ಮಾಡಿಕೊಡಲಿಕ್ಕಾಗಿ ಮಿಲಿ ಮೊಬೈಲ್‌ನಲ್ಲಿದ್ದ ಹಳೆಯ ವಿಡಿಯೋ ಕ್ಲಿಪ್ಪಿಂಗ್‌ಗಳನ್ನು ಡಿಲಿಟ್ ಮಾಡಿದರು. ಇದರಿಂದ ಮಿಲಿ ಬದುಕಿದ್ದಾಳೆ ಎಂಬ ಆಸೆ ಆಕೆಯ ತಂದೆ ತಾಯಿಯರಿಗೆ ಉಂಟಾಯಿತು.
ಕೆಲವು ವಿಡಿಯೊಗಳು ಮತ್ತು ಎಸ್‌ಎಂಎಸ್‌ಗಳನ್ನು ಡಿಲಿಟ್ ಮಾಡಿದ್ದರಿಂದಾಗಿ ಆಕೆಯ ಕೊಲೆ ಬಗ್ಗೆ ಹೆಚ್ಚಿನ ಮಾಹಿತಿ ನೀಡಬಹುದಾಗಿದ್ದ ಮಹತ್ವದ ದಾಖಲೆಗಳು ನಾಶವಾದವು. ಮಿಲಿ ಜೀವಂತ ಇರಬಹುದು ಎಂದು ತಂದೆ ಬಾಬ್ ಡಾವ್ಲರ್ ಮತ್ತು ತಾಯಿ ಸ್ಯಾಲಿ ಡಾವ್ಲರ್ ಅವರು ಎಲ್ಲೆಡೆ ಹುಡುಕಾಡತೊಡಗಿದರು. ಆಕೆಯನ್ನು ಹಾಲೆಂಡ್‌ನಲ್ಲಿ ಕೂಡಿಡಲಾಗಿದೆ; ಅಲ್ಲಿನ ವೇಶ್ಯಾವಾಟಿಕೆಗಳಲ್ಲಿ ಆಕೆ ನಗ್ನ ನೃತ್ಯಗಾತಿಯಾಗಿ ಕುಣಿಯುತ್ತಿದ್ದಾಳೆ ಎಂಬ ಸುದ್ದಿಗಳು ಹಬ್ಬಿದವು. ಇದನ್ನು ನಂಬಿದ ತಂದೆ-ತಾಯಿ ತಮ್ಮ ಮಗಳ ಮೊಬೈಲ್‌ಗೆ ಉತ್ತರ ಬಂದೀತೆಂಬ ನಿರೀಕ್ಷೆಯಲ್ಲಿ ಎಸ್‌ಎಂಎಸ್ ಕಳುಹಿಸುತ್ತಲೇ ಇದ್ದರು.
ಆದರೆ, ಅಂತಿಮವಾಗಿ ಆಕೆಯ ಡೀಕಂಪೋಸ್ಡ್ ಬಾಡಿ ೨೦೦೨ರ ಸೆಪ್ಟೆಂಬರ್ ೧೮ರಂದು ಸಿಕ್ಕಿತು. ಹೀಗೆ ಸಿಕ್ಕ ಮಿಲಿಯ ಹೆಣವು ’ನ್ಯೂಸ್ ಆಫ್ ದಿ ವರ್ಲ್ಡ್’ ಪತ್ರಿಕೆಯ ಆತ್ಮಹತ್ಯೆಗೆ ನಾಂದಿ ಹಾಡಿತು.
* * *
೧೮೪೩ರ ಅಕ್ಟೋಬರ್ ೧ರ ಭಾನುವಾರ ಪ್ರಾರಂಭವಾದ ’ನ್ಯೂಸ್ ಆಫ್ ದಿ ವರ್ಲ್ಡ್’ ಎಂಬ ಪತ್ರಿಕೆಯು ಇದೇ ಭಾನುವಾರ, ಜುಲೈ, ೧೦, ೨೦೧೧ರಂದು ಕೊನೆಯುಸಿರೆಳೆಯಿತು. ಜಾನ್ ಬ್ರೌನ್ ಬೆಲ್ ಎಂಬಾತ ಹುಟ್ಟುಹಾಕಿದ ಈ ಪತ್ರಿಕೆಯನ್ನು ಮುರ್ಡೋಕ್ ಮುಗಿಸಿದರು. ಇದರ ಕೊನೆಯ ಪ್ರಕಾಶಕನೆಂದರೆ, ನ್ಯೂಸ್ ಇಂಟರ್‌ನ್ಯಾಷನಲ್ ಸಂಸ್ಥೆಯ ಯುರೋಪ್ – ಏಷ್ಯದ ಅಧ್ಯಕ್ಷ ಮತ್ತು ಮುಖ್ಯ ಕಾರ್ಯನಿರ್ವಾಹಕ ಜೇಮ್ಸ್ ಮುರ್ಡೋಕ್. ಇಂಗ್ಲೆಂಡ್‌ನಿಂದ ಪ್ರಕಟವಾಗುತ್ತಿದ್ದ ಈ ಪತ್ರಿಕೆ ೧೬೮ ವರ್ಷಗಳ ಕಾಲ ಇಂಗ್ಲೆಂಡಿನ ಜನಜೀವನದಲ್ಲಿ ರಕ್ತದಂತೆ ಹರಿದಾಡುತ್ತಿತ್ತು. ಅನೇಕರಿಗೆ ದುಃಸ್ವಪ್ನವಾಗಿತ್ತು. ಸೆಲೆಬ್ರಿಟಿಗಳ ಕಾಮಕೇಳಿಗಳಿಗೇ ಹೆಚ್ಚು ಮಹತ್ವ ನೀಡುತ್ತಾ, ಅವುಗಳನ್ನೇ ಹೆಚ್ಚಾಗಿ ವರದಿ ಮಾಡುತ್ತಿದ್ದ ಕಾರಣ ಇದಕ್ಕೆ ’ನ್ಯೂಸ್ ಆಫ್ ದಿ ಸ್ಕ್ರಿವ್ಸ್’ (ಕಾಮಕೇಳಿಗಳ ಸುದ್ದಿ) ಎಂಬ ಕುಖ್ಯಾತಿ ಅಂಟಿಕೊಂಡಿತ್ತು. ’ಸ್ಕ್ರೀವ್ಸ್ ಆಫ್ ದಿ ವರ್ಲ್ಡ್’ (ಜಗತ್ತಿನ ಕಾಮಕೇಳಿಗಳು) ಎಂತಲೂ ಇದನ್ನು ಜರೆಯಲಾಗುತ್ತಿತ್ತು. ಆದರೂ, ಇದು ಅತಿ ಜನಪ್ರಿಯ ಮತ್ತು ಅತಿ ಪ್ರಸಾರದ ಪತ್ರಿಕೆಯಾಗಿತ್ತು. ಅದರದ್ದು ಸುದ್ದಿಮಾರ್ಗವಲ್ಲ ’ಕಾಮ’ರಾಜಮಾರ್ಗ. ರಾಜಕಾರಣಿಗಳು, ಉದ್ಯಮಿಗಳು, ಉದ್ಯಮಿಗಳ ಪತ್ನಿಯರು, ಚಿತ್ರ ನಟ-ನಟಿಯರು, ಅವರ ವರ್ಣರಂಜಿತ ಜೀವನ, ಶೃಂಗಾರ ದೇವಿ-ದೇವತೆಯರು, ಅವರ ವಯ್ಯಾರಗಳು, ಅವರ ಲಲ್ಲೆಗಳು, ಕಾಮಕೇಳಿಗಳ ರಸವತ್ತಾದ ವರ್ಣನೆಗಳು, ಕೊಲೆ- ಸುಲಿಗೆಗಳ ಕರಾರುವಾಕ್ ವಿವರಣೆ- ಹೀಗೆ ಒಟ್ಟಿನಲ್ಲಿ ಪಕ್ಕಾ ಮಸಾಲೆ ಪತ್ರಿಕೆಯೇ ಆಗಿತ್ತು. ಅಂಥ ಒಂದು ಪತ್ರಿಕೆಯು ಇದೀಗ ಅಪರಾಧಿ ಸ್ಥಾನದಲ್ಲಿ ನಿಂತಿದೆ. ವಿಶ್ವದ ಪತ್ರಿಕಾ ಇತಿಹಾಸದಲ್ಲಿ ಒಂದು ಕಪ್ಪು ಅಧ್ಯಾಯವಾಗಿ ಹೊರಹೊಮ್ಮಿದೆ.
ರೂಪರ್ಟ್ ಮುರ್ಡೋಕ್ ಅವರು ಇಂಗ್ಲೆಂಡ್‌ನಲ್ಲಿ ಮೊಟ್ಟ ಮೊದಲ ಬಾರಿಗೆ ’ನ್ಯೂಸ್ ಆಫ್ ದಿ ವರ್ಲ್ಡ್’ ಪತ್ರಿಕೆ ಕೊಂಡು ತಮ್ಮ ಮಾಧ್ಯಮ ಸಾಮ್ರಾಜ್ಯಕ್ಕೆ ಸೇರಿಸಿಕೊಂಡರು. ಅದಾದ ನಂತರ ಅವರು ’ದಿ ಸನ್’ ಸೇರಿದಂತೆ ಇನ್ನೂ ಮೂರು ಪತ್ರಿಕೆಗಳನ್ನು ಕೊಂಡರು. ಈ ಪತ್ರಿಕೆಯ ಮಾರಾಟ ವ್ಯಾಪಕವಾಗಿತ್ತು. ೨೮,೧೨,೦೦೫ ಪ್ರತಿಗಳು ಪ್ರತಿ ವಾರ ಮಾರಾಟವಾಗುತ್ತಿದ್ದವು. ಒಟ್ಟು ೭.೫ ದಶಲಕ್ಷ ಓದುಗರು ಪ್ರತಿವಾರ ಈ ಪತ್ರಿಕೆ ಓದುತ್ತಿದ್ದರು.
ಈ ಪತ್ರಿಕೆಯ ಭಾನಗಡಿಗಳು ಗ್ರೇಟ್‌ಬ್ರಿಟನ್‌ನ ಪ್ರಧಾನಿ ಡೇವಿಡ್ ಕೆಮರೂನ್‌ಗೆ ಮಗ್ಗುಲ ಮುಳ್ಳಾಗಿವೆ. ಫೋನ್ ಹ್ಯಾಕಿಂಗ್ ಹಗರಣದ ತನಿಖೆಗೆ ಕೂಡಲೇ ಸೂಕ್ತ ನ್ಯಾಯಮೂರ್ತಿಗಳ ನೇಮಕ ಮಾಡಬೇಕು ಎಂದು ಜನರು ಒತ್ತಾಯಿಸುತ್ತಿದ್ದಾರೆ. ಜೊತೆಗೆ, ಆ ಪತ್ರಿಕೆಯ ಮಾಜಿ ಸಂಪಾದಕನಾದ ಆಂಡಿ ಕೌಲ್ಸನ್ ಎಂಬಾತನನ್ನು ತನ್ನ ಮಾಧ್ಯಮ ಸಲಹೆಗಾರನ್ನಾಗಿ ನೇಮಕ ಮಾಡಿಕೊಂಡಿದ್ದಕ್ಕಾಗಿ ವ್ಯಾಪಕ ಟೀಕೆಗೆ ಒಳಗಾಗಿದ್ದಾರೆ. ಹೀಗಾಗಿ ಎತ್ತ ಹೊರಳಿದರೂ ’ನ್ಯೂಸ್ ಆಫ್ ದಿ ವರ್ಲ್ಡ್’ನ ಸರಣಿ ಕುಕೃತ್ಯಗಳು ಕೆಮರೂನ್‌ಗೆ ಚುಚ್ಚುತ್ತಿವೆ. ರೂಪರ್ಟ್ ಮುರ್ಡೋಕ್‌ನ ’ನ್ಯೂಸ್ ಇಂಟರ್‌ನ್ಯಾಷನಲ್’ ಎಂಬ ಪತ್ರಿಕಾ ಸಮೂಹದ ಈ ದುಷ್ಟ ಪತ್ರಿಕೆಯಿಂದಾಗಿ ಮುರ್ಡೋಕ್‌ರ ಪತ್ರಿಕಾ ಸಾಮ್ರಾಜ್ಯವನ್ನೇ ಇದು ಹಾಫ್ ಮರ್ಡರ್ ಮಾಡಿದಂತಾಗಿದೆ.
* * * *
ಮಿಲಿ ಡಾವ್ಲರ್‌ಳಂತೆ ಇಂಗ್ಲೆಂಡ್‌ನ ಸುಮಾರು ೪,೦೦೦ಕ್ಕೂ ಅಧಿಕ ಜನರ ಮೊಬೈಲ್ ಫೋನ್‌ಗಳಿಗೆ ಈ ಪತ್ರಿಕೆಯು ’ಕನ್ನ’ ಹಾಕಿತು. ೨೦೦೫ರ ಜುಲೈ ೭ರಂದು ಸಂಭವಿಸಿದ ಭಯೋತ್ಪಾದಕ ದಾಳಿಯಲ್ಲಿ ೫೨ ಜನರು ಮೃತರಾದರು. ಹೀಗೆ ಮೃತರಾದ ವ್ಯಕ್ತಿಗಳು ಮತ್ತು ಅವರ ಸಂಬಂಧಿಕರ ಫೋನ್‌ಗಳನ್ನೂ ಇದು ಹ್ಯಾಕ್ ಮಾಡಿತು. ಇಂಗ್ಲೆಂಡ್‌ನ ಪ್ರಖ್ಯಾತ ವ್ಯಕ್ತಿಗಳು, ರಾಜಕಾರಣಿಗಳು, ಚಿತ್ರ ನಟ-ನಟಿಯರು, ಫುಟ್‌ಬಾಲ್ ಆಟಗಾರರು, ಸಮಾಜದ ಗಣ್ಯರು, ಇರಾಕ್ ಯುದ್ಧದಲ್ಲಿ ಮೃತ ಯೋಧರ ಕುಟುಂಬದವರು, ವಿಕೃತ ಕಾಮಿಗಳು, ಅವರಿಂದ ಅಪಹರಣಕ್ಕೆ ಒಳಗಾಗಿ ಕೊಲೆಯಾದವರು- ಹೀಗೇ ಸುಮಾರು ೪೦೦೦ಕ್ಕೂ ಅಧಿಕ ವ್ಯಕ್ತಿಗಳ ಮೊಬೈಲ್ ಫೋನ್ ಅಕೌಂಟ್‌ಗೇ ಕನ್ನ ಹಾಕಿ (ಹ್ಯಾಕ್ ಮಾಡಿ) ಅದರಲ್ಲಿ ಅವರ ವೈಯಕ್ತಿಕ ವಿಚಾರಗಳು, ಪ್ರೇಮ ಸಲ್ಲಾಪಗಳು, ಬ್ಯಾಂಕ್‌ನೊಂದಿಗಿನ ಹಣಕಾಸು ವ್ಯವಹಾರಗಳು, ತಂತಮ್ಮ ಕಂಪೆನಿ ವ್ಯವಹಾರಗಳು, ಗುಪ್ತ ಮಾತುಕತೆಗಳು, ಇ-ಮೇಲ್ ವಿನಿಮಯಗಳು, ಆಸ್ತಿಪಾಸ್ತಿಯ ಮಹತ್ವದ ದಾಖಲೆಗಳು- ಮುಂತಾದವುಗಳನ್ನು ’ನ್ಯೂಸ್ ಆಫ್ ದಿ ವರ್ಲ್ಡ್’ ಪತ್ರಿಕೆಯ ವರದಿಗಾರರು ವಾಮಮಾರ್ಗದಿಂದ ಪಡೆದುಕೊಂಡರು. ಹೀಗೆ ಪಡೆದುಕೊಂಡ ಮಾಹಿತಿಗಳಲ್ಲಿ ವಿಡಿಯೊ ಕ್ಲಿಪಿಂಗ್‌ಗಳು, ಬ್ಯಾಂಕ್ ಅಕೌಂಟ್ ದಾಖಲೆಗಳು, ವೈಯಕ್ತಿಕ ಗುಟ್ಟಿನ ವಿಚಾರಗಳು ಸೇರಿದ್ದವು. ಹೀಗೆ ಅಪರಾಧ ಮಾರ್ಗದಿಂದ ಸುದ್ದಿ ಮಾಹಿತಿ ಪಡೆಯುವ ದುಷ್ಕೃತ್ಯವನ್ನು ಬಹಳ ಹಿಂದಿನಿಂದಲೇ ಅದು ನಡೆಸುತ್ತಿತ್ತು. ಅದಕ್ಕಾಗಿ ಒಂದು ಖಾಸಗಿ ಡಿಟೆಕ್ಟಿವ್ ಏಜೆನ್ಸಿಯನ್ನೇ ನೇಮಕ ಮಾಡಿಕೊಳ್ಳಲಾಗಿತ್ತು.
೨೦೦೩ರಿಂದ ೨೦೦೭ರ ಅವಧಿಯಲ್ಲಿ ಪತ್ರಿಕೆಯ ಸಹ ಸಂಪಾದಕನಾಗಿದ್ದ ಮತ್ತು ಬ್ರಿಟನ್‌ನ ಪ್ರಧಾನಿಯ ಮಾಧ್ಯಮ ಸಲಹೆಗಾರನಾಗಿ ಕೆಲಸ ಮಾಡುತ್ತಿದ್ದ (೨೦೧೧ರ ಜನವರಿಯಲ್ಲಿ ಆ ಸ್ಥಾನಕ್ಕೆ ರಾಜೀನಾಮೆ) ಆಂಡಿ ಕೌಲ್ಸನ್ ಮತ್ತು ಅದಕ್ಕಿಂತ ಮೊದಲು ಪತ್ರಿಕೆಯ ಸಂಪಾದಕಿಯಾಗಿದ್ದ ರೆಬೆಕ್ಕಾ ಬ್ರೂಕ್ಸ್ ಎಂಬಾಕೆಯೇ ಫೋನ್ ಹ್ಯಾಕಿಂಗ್ ಸ್ಕ್ಯಾಂಡಲ್‌ನ ರೂವಾರಿಗಳು ಎನ್ನಲಾಗಿದೆ. ರೆಬ್ಬೆಕ್ಕಾ ಬ್ರೂಕ್ಸ್ ಮತ್ತು ಆಂಡಿ ಕೌಲ್ಸನ್ ಅವರಿಗಿಂತಲೂ ಮೊದಲು ಪತ್ರಿಕೆಯ ವರದಿಗಾರನಾಗಿದ್ದ ಕ್ಲೈವ್ ಗುಡ್‌ಮನ್ ಎಂಬಾತನು ಖಾಸಗಿ ಗೂಢಚರ್ಯ ಗ್ಲೆನ್ ಮುಲ್‌ಕೇರ್‌ನಿಂದ ಮಾಹಿತಿ ಪಡೆಯುತ್ತಿದ್ದನು. ಬ್ರಿಟಿಷ್ ರಾಜಮನೆತನದವರ ಫೋನ್‌ಗಳನ್ನು ಹ್ಯಾಕ್ ಮಾಡಿ ಮಾಹಿತಿ ಸಂಗ್ರಹಿಸಿದ ಆರೋಪದ ಮೇಲೆ ಆತನನ್ನು ೨೦೦೭ರಲ್ಲಿ ಬಂಧಿಸಿ ಜೈಲಿಗೆ ತಳ್ಳಲಾಗಿತ್ತು.
ಲಂಚ ನೀಡಿತೇ ಮುರ್ಡೋಕ್ ಪತ್ರಿಕೆ?
ಫೋನ್ ಕದ್ದಾಲಿಕೆ, ಸೆಲ್‌ಫೋನ್‌ಗಳ ಹ್ಯಾಕಿಂಗ್ ಮಾಡಿದ್ದಲ್ಲದೇ ಅದನ್ನು ಮುಚ್ಚಿ ಹಾಕಲು ಪೊಲೀಸರಿಗೆ ಈ ಪತ್ರಿಕೆ ಭಾರಿ ಮೊತ್ತದ ಲಂಚ ನೀಡಿದೆ. ಹ್ಯಾಕಿಂಗ್ ಆರೋಪದಿಂದ ಮುಕ್ತವಾಗಲು ಕೋರ್ಟ್‌ನ ಹೊರಗೆ ಸೆಟಲ್‌ಮೆಂಟ್ ಮಾಡಿಕೊಳ್ಳುವ ಉದ್ದೇಶದಿಂದ ಒಂದು ದಶಲಕ್ಷ ಪೌಂಡ್‌ಗಿಂತಲೂ ಅಧಿಕ ಮೊತ್ತದ ಹಣ ಪಾವತಿಸಲಾಗಿದೆ. ಹೀಗೆ ಕೋರ್ಟ್‌ನ ಹೊರಗೆ ಪ್ರಕರಣ ಇತ್ಯರ್ಥ ಮಾಡಿಕೊಂಡವರಲ್ಲಿ ಪ್ರೊಫೆಷನಲ್ ಫುಟ್‌ಬಾಲರ‍್ಸ್ ಅಸೋಷಿಯೇಷನ್‌ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಗೋರ್ಡಾನ್ ಟೇಲರ್ ಪ್ರಮುಖರು. ಹಾಗೆಯೇ ಸಂಸದ ಸೈಮನ್ ಹಗ್ಸ್, ಸೆಲೆಬ್ರಿಟಿಗಳ ಸಾರ್ವಜನಿಕ ಸಂಪರ್ಕಾಧಿಕಾರಿ ಮ್ಯಾಕ್ಸ್ ಕ್ಲಿಫರ್ಡ್, ಖ್ಯಾತ ಮಾಡೆಲ್ ಎಲೇ ಮ್ಯಾಕ್‌ಫರ‍್ಸನ್, ಫುಟ್‌ಬಾಲ್ ಏಜೆಂಟ್ ಸ್ಕೈ ಆಂಡ್ರೂ ಮುಂತಾದವರೊಂದಿಗೆ ಕೋರ್ಟ್‌ನ ಹೊರಗೆ ಒಪ್ಪಂದ ಮಾಡಿಕೊಂಡಿತು.
ಈ ಬಗ್ಗೆ ನ್ಯೂಸ್ ಇಂಟರ್‌ನ್ಯಾಷನಲ್ ಸಂಸ್ಥೆಯ ಮುಖ್ಯ ಕಾರ್ಯ ನಿರ್ವಾಹಕ ಅಧಿಕಾರಿಗಳು ನ್ಯಾಯಾಲಯಕ್ಕೆ ಆಗ ಲಿಖಿತ ಹೇಳಿಕೆ ನೀಡಿ, ಇಂಥ ಯಾವುದೇ ಹ್ಯಾಕಿಂಗ್ ಅನ್ನು ’ನ್ಯೂಸ್ ಆಫ್ ದಿ ವರ್ಲ್ಡ್’ ಪತ್ರಿಕೆಯಾಗಲೀ, ಪತ್ರಿಕೆಯಲ್ಲಿನ ಪತ್ರಕರ್ತರಾಗಲೀ ಮಾಡಿಲ್ಲ ಎಂದು ಹೇಳಿದ್ದರು. ಆದರೆ, ಈಗ ಎಲ್ಲವೂ ಹೊರ ಬಂದಿದೆ. ಆ ಪತ್ರಿಕೆಯ ಪತ್ರಕರ್ತರು ಎಷ್ಟು ಕೊಳಕರಿದ್ದರು ಎಂಬುದು ಬಹಿರಂಗವಾಗಿದೆ. ಪತ್ರಿಕೆಯ ಸಂಪಾದಕಿಯಾಗಿದ್ದ ರೆಬೆಕ್ಕಾ ಬ್ರೂಕ್ಸ್ ಅವರ ಕಾಲದಲ್ಲಿ ಈ ರೀತಿ ಲಂಚ ನೀಡಲಾಗಿಲ್ಲ ಎಂದು ಜೇಮ್ಸ್ ಮುರ್ಡೋಕ್ ಸಮರ್ಥಿಸಿಕೊಂಡರು.
ಅನೈತಿಕ ಮತ್ತು ಕಾನೂನಿಗೆ ವಿರುದ್ಧವಾದ ರೀತಿಯಲ್ಲಿ ಸುದ್ದಿ ಸಂಗ್ರಹ ಮಾಡುವಲ್ಲಿ ಎತ್ತಿದ ಕೈ ಎನಿಸಿದ್ದ ಪತ್ರಿಕೆಯು, ಸುದ್ದಿ ಸಂಗ್ರಹಿಸಲು ಹಲವಾರು ವಾಮಮಾರ್ಗಗಳನ್ನು ಅನುಸರಿಸುತ್ತಿತ್ತು. ಗೂಢಚರ್ಯರ ನೇಮಕ ಮಾಡಿಕೊಳ್ಳುತ್ತಿತ್ತು. ಕೆಲವು ಪತ್ರಕರ್ತರು ವೇಷ ಮರೆಸಿಕೊಂಡು ಹೋಗಿ ಉಪಾಯವಾಗಿ ಸುದ್ದಿ ಸಂಗ್ರಹಿಸುತ್ತಿದ್ದರು. ಹೋಟೆಲ್‌ಗಳಲ್ಲಿ ಮಾಣಿಗಳಾಗಿದ್ದು ಅಲ್ಲಿನ ವಿದ್ಯಮಾನಗಳನ್ನು ಸಂಗ್ರಹಿಸಿ ವರದಿ ಮಾಡುತ್ತಿದ್ದರು. ಪತ್ರಿಕೆಯು ಅದೇ ರೀತಿ ಪ್ರತಿಯೊಂದು ಕ್ಷೇತ್ರದಲ್ಲೂ ಅಂಡರ್‌ಕವರ್ ವರದಿಗಾರರ ಜಾಲ ಹೊಂದಿತ್ತು ಎಂಬುದು ಬಹಿರಂಗವಾಗಿದೆ. ಅದಕ್ಕೆ ಪಾಕ್ ಕ್ರಿಕೆಟ್ ತಂಡದ ೨೦೧೦ರ ಸ್ಪಾಟ್ ಫಿಕ್ಸಿಂಗ್ ಹಗರಣ ಪ್ರಮುಖ ಉದಾಹರಣೆ. ಮಜಹರ್ ಮಹಮೂದ್ ಎಂಬಾತನು ’ಫೇಕ್ ಶೇಕ್’ ಎಂಬ ಹೆಸರಿನಲ್ಲಿ ಹೋಗಿ ಮುಜಹರ್ ಮಜೀದ್ ಎಂಬ ಬುಕ್ಕಿಯೊಬ್ಬನ ಕುಕೃತ್ಯಗಳನ್ನು ಬಹಿರಂಗಗೊಳಿಸಿದ್ದನು. ಸಾರ್ವಜನಿಕ ವ್ಯಕ್ತಿಗಳ ವೈಯಕ್ತಿಕ ಸಂಬಂಧಗಳು, ಕಾಮಕೇಳಿಗಳ ವಿವರಗಳನ್ನು ಸಂಗ್ರಹಿಸಲೂ ಕೂಡ ಇದೇ ರೀತಿಯಲ್ಲಿ ಗೂಢಚರ್ಯರನ್ನು ಪತ್ರಿಕೆ ನೇಮಕ ಮಾಡಿಕೊಂಡಿತ್ತು. ಒಂದರ್ಥದಲ್ಲಿ ಇದೆಲ್ಲವೂ ಕನ್ನಡದ ಅಂಬರೀಷ್ ಅಭಿನಯದ ’ನ್ಯೂಡೆಲ್ಲಿ’ ಚಿತ್ರಕಥೆಯಂತೆ ಇದೆ.
* * * *
ಇಂಥದ್ದೊಂದು ದೊಡ್ಡ ಹಗರಣ ಪತ್ರಿಕಾ ಕ್ಷೇತ್ರದ ಹೊರತಾಗಿ ಬೇರೆ ಕ್ಷೇತ್ರದಲ್ಲಿ ಆಗಿದ್ದರೆ ಅದನ್ನು ವಿಶ್ವದ ಎಲ್ಲಾ ಪತ್ರಿಕೆಗಳು/ ಮಾಧ್ಯಮಗಳು ’ವಿಶ್ವದ ಅತಿದೊಡ್ಡ ಹಗರಣ’ ಎಂಬಂತೆ ಬಿಂಬಿಸುತ್ತಿದ್ದವು. ಇಷ್ಟು ಕ್ಷುದ್ರ ಹಗರಣಕ್ಕೆ ಕಾರಣವಾದ ವ್ಯಕ್ತಿಗಳನ್ನು ಕೂಡಲೇ ಬಂಧಿಸಿ, ಅವರು ತಂತಮ್ಮ ಸ್ಥಾನಗಳಿಗೆ ರಾಜೀನಾಮೆ ಕೊಡುವಂತೆ ಒತ್ತಾಯಿಸುತ್ತಿದ್ದವು. ಹಗರಣಕ್ಕೆ ಕಾರಣರಾದ ವ್ಯಕ್ತಿಗಳ ಪೂರ್ವಾಪರವನ್ನೆಲ್ಲ ದಿನದ ೨೪ ತಾಸೂ ಸುದ್ದಿ ವಾಹಿನಿಯಲ್ಲಿ ಬಿತ್ತರಿಸಿ, ಅವರ ಮಾನ- ಮರ್ಯಾದೆ ಎಲ್ಲವನ್ನೂ ಹರಾಜು ಹಾಕಲಾಗುತ್ತಿತ್ತು. ಆದರೆ, ಇದು ಪತ್ರಿಕೆಗಳೇ ಮಾಡಿದ ವಿಶ್ವ ಕಂಡ ಅತ್ಯಂತ ಅಮಾನವೀಯ ಮತ್ತು ಅನೈತಿಕ ಕಾರ್ಯವಾದರೂ ಸಹ ಸುದ್ದಿ ಮಾಧ್ಯಮ ಜಗತ್ತು ಬಹುತೇಕ ಮೌನವಾಗಿದೆ. ಅದಕ್ಕೆ ಯಾವುದೇ ಪ್ರಖರ ಪ್ರತಿಕ್ರಿಯೆಗಳು ಬರುತ್ತಿಲ್ಲ. ’ದಿ ಗಾರ್ಡಿಯನ್’ ಬಿಟ್ಟು ಬೇರೆ ಯಾವುದೇ ಸುದ್ದಿ ಮಾಧ್ಯಮವೂ ಅಷ್ಟೊಂದು ಗಂಭೀರವಾಗಿ ಪರಿಗಣಿಸಿಲ್ಲ.
ರೂಪರ್ಟ್ ಮುರ್ಡೋಕ್ ಸಾಮ್ರಾಜ್ಯ ವಿಶ್ವದಾದ್ಯಂತ ಇರುವ ಕಾರಣ, ಅವರು ತಮ್ಮ ಯಾವುದೇ ಸುದ್ದಿ ಮಾಧ್ಯಮದಲ್ಲಿ ಇದರ ಬಗ್ಗೆ ಹೆಚ್ಚಿಗೆ ಪ್ರಸಾರ ಪ್ರಚಾರ ಆಗದಂತೆ ನೋಡಿಕೊಂಡಿದ್ದಾರೆ. ಹಗರಣವು ಕೇವಲ ಇಂಗ್ಲೆಂಡ್‌ಗೆ ಸೀಮಿತವಾದುದು ಎಂಬಂತೆ ಬಿಂಬಿಸಲಾಗಿದೆ. ಆದರೆ, ಇಡೀ ಹಗರಣವು ಪತ್ರಿಕಾ ಕ್ಷೇತ್ರಕ್ಕೆ ಸಂಬಂಧಿಸಿದುದಾಗಿದೆ. ಮುರ್ಡೋಕ್ ಸಾಮ್ರಾಜ್ಯದ ಇನ್ನೂ ನೂರಾರು ಸುದ್ದಿ ಪತ್ರಿಕೆಗಳು, ಮಾಧ್ಯಮ ಸಂಸ್ಥೆಗಳು ಇಂಥದ್ದೇ ಕೆಲಸ ಮಾಡುತ್ತಿರಬಹುದು. ಬೇರೆ ಪತ್ರಿಕೆಗಳು ಇಂಥದ್ದೇ ಅಥವಾ ಇದೇ ಮಾದರಿಯ ಭಾನಗಡಿಗಳನ್ನು ಮಾಡುತ್ತಿರಬಹುದು. ಆದರೆ, ಅವುಗಳು ಬಹಿರಂಗಗೊಂಡಿಲ್ಲ.
ಬ್ರೂಕ್ಸ್ ಕಡೆ ಬೆರಳು?
’ನ್ಯೂಸ್ ಆಫ್ ದಿ ವರ್ಲ್ಡ್’ ಅಂತಿಮ ಸಂಚಿಕೆ ಭಾನುವಾರ ಬೆಳಿಗ್ಗೆ ಹೊರಬಂದ ನಂತರ ಕೆಲಸ ಕಳೆದುಕೊಂಡ ೨೦೦ ಜನ ಪತ್ರಕರ್ತರು ಪತ್ರಿಕೆಯ ಮಾಜಿ ಸಂಪಾದಕಿ ರೆಬೆಕ್ಕಾ ಬ್ರೂಕ್ಸ್ ಕಡೆ ಬೆರಳು ತೋರಿಸುತ್ತಿದ್ದಾರೆ. ಈ ಹಗರಣದಲ್ಲಿ ಭಾಗಿಯಾದವರೆಲ್ಲರೂ ಇದೀಗ ಪತ್ರಿಕೆಯಲ್ಲಿಲ್ಲ. ಆದರೆ, ೧೬೮ ವರ್ಷಗಳ ಪತ್ರಿಕೆಯೊಂದನ್ನು ಮುಚ್ಚುವ ನಿರ್ಧಾರ ಕೈಗೊಂಡಿರುವುದು ಸರಿಯಲ್ಲ ಎಂದು ಹಲವು ಉದ್ಯೋಗಿಗಳು ಮುರ್ಡೋಕ್‌ರ ಪತ್ರಿಕೆ ಮುಚ್ಚುವ ನಿರ್ಧಾರದ ವಿರುದ್ಧ ಕಿಡಿಕಾರಿದರು.
ಪ್ರಜಾಪ್ರಭುತ್ವದ ಆಧಾರ ಸ್ತಂಭವಾಗಿರುವ ಪತ್ರಿಕಾ/ಮಾಧ್ಯಮ ರಂಗವು ಇಷ್ಟೊಂದು ಪ್ರಮಾಣದಲ್ಲಿ ದಿವಾಳಿಯೆದ್ದು, ಪತ್ರಿಕೋದ್ಯಮದ ನೀತಿ ನಿಯಮಗಳನ್ನೆಲ್ಲ ಗಾಳಿಗೆ ತೂರಿದ್ದು ದೊಡ್ಡ ದುರಂತವೇ ಸರಿ.

Advertisements

ಔಷಧಿಗಳ ಬೆಲೆ ಏರಿಕೆ: ರಕ್ಷಿಪರಾರು?

ಸೆಪ್ಟೆಂಬರ್ 24, 2010

ಔಷಧಿಗಳ ಬೆಲೆ ಏರಿಕೆ: ರಕ್ಷಿಪರಾರು?

-ವೀರಣ್ಣ ಕಮ್ಮಾರ

ಕಳೆದ ೩ ಶತಮಾನಗಳಲ್ಲಿ ಜಾಗತಿಕ ಇತಿಹಾಸದಲ್ಲಿ ಏನೆಲ್ಲ ಅಲ್ಲೋಲ ಕಲ್ಲೋಲಗಳು ಸಂಭವಿಸಿವೆ. ಎಷ್ಟೋ ಸಾಮ್ರಾಜ್ಯಗಳು ಮುಳುಗಿ ಹೋದವು. ಸೂರ್ಯ ಮುಳುಗದ ಸಾಮ್ರಾಜ್ಯ ಎನಿಸಿಕೊಂಡಿದ್ದ ಬ್ರಿಟಿಷ್ ಸಾಮ್ರಾಜ್ಯ ನುಚ್ಚು ನೂರಾಯಿತು. ಅಮೆರಿಕಕ್ಕೆ ಸೆಡ್ಡು ಹೊಡೆದಿದ್ದ? ಸೋವಿಯತ್ ರಷ್ಯಾವನ್ನು ಅಮೆರಕವೇ ಕುತಂತ್ರದಿಂದ ಛಿದ್ರ ಛಿದ್ರವಾಗಿಸಿತು. ಎಷ್ಟೋ ಯುದ್ಧಗಳು ಸಂಭವಿಸಿದವು. ಜನಾಂಗೀಯ ಯುದ್ಧಗಳು, ರಾಜ್ಯ ವಿಸ್ತರಣೆಯ ಭೀಕರ ಯುದ್ಧಗಳು, ಮಹಾ ಮಾರಿ ರೋಗಗಳು- ಏನೆಲ್ಲಾ ಸಂಭವಿಸಿದವು. ೨೦ನೇ ಶತಮಾನದಲ್ಲಿ ಸಂಭವಿಸಿದ ಎರಡು ಮಹಾ ಯುದ್ಧಗಳು, ಒಂದು ಭೀಕರ ಆರ್ಥಿಕ ಹಿನ್ನಡೆ (೧೯೩೦ರ ದಶಕದಲ್ಲಿ) ಹಾಗೂ ೧೯೯೦ರ ದಶಕದಲ್ಲಿ ಸಂಭವಿಸಿದ ಸಣ್ಣ ಆರ್ಥಿಕ ಹಿಂಜರಿತಗಳು- ೧೨೦ಕ್ಕೂ ಅಧಿಕ ದೇಶಗಳಲ್ಲಿ ಉದ್ಭವಿಸಿದ ಪ್ರಜಾಪ್ರಭುತ್ವವಾದಿ ರಾಜ್ಯಗಳು- ಇತ್ಯಾದಿ ಭಾರಿ ’ಸಮುದ್ರ ಮಥನ’ವೇ ಸಂಭಸಿದೆ. ಎಷ್ಟೋ ಉದ್ಯಮ ಸಾಮ್ರಾಜ್ಯಗಳು ಬೆಳೆದಿವೆ. ಅದೆಷ್ಟೋ ಉದ್ಯಮ ಸಾಮ್ರಾಜ್ಯಗಳು ಅಳಿದಿವೆ.

ಏನೆಲ್ಲ ಆದರೂ ಕಳೆದ ಮೂರು ಶತಮಾನಗಳಲ್ಲಿ ಏಕ ರೀತಿಯಿಂದ ಯಾವುದೇ ’ಹಿಂಜರಿತ’ (ರಿಸೆಷನ್) ಇಲ್ಲದೇ ಬೆಳೆಯುತ್ತಿರುವ ಏಕೈಕ ಉದ್ಯಮ ಎಂದರೆ- ಔಷಧೋದ್ಯಮ. ಔಷಧಿಗಳ ಉತ್ಪಾದನೆ, ಹಂಚಿಕೆ, ವಿತರಣೆ, ಮಾರಾಟ- ಈ ಯಾವ ವಿಭಾಗದಲ್ಲಿಯೂ ಹಿಂಜರಿತ ಉಂಟಾಗಿಲ್ಲ. ಔಷಧಿಗಳ ಬೇಡಿಕೆ ಕಡಿಮೆಯಾಗಿಲ್ಲ. ಅವುಗಳ ಉತ್ಪಾದನೆ ಮತ್ತು ಮಾರಾಟದಲ್ಲಿನ ಏರಿಕೆ ಏಕ ರೂಪವಾಗಿದ್ದರೆ, ಅವುಗಳ ಬೆಲೆಗಳಲ್ಲಿನ ಏರಿಕೆ ಇನ್ನೂ ಭೀಕರವಾಗಿದೆ. ಯಾರ ಗಮನಕ್ಕೂ ಬಾರದೇ, ಯಾವ ಸರ್ಕಾರಗಳ ಎಂತೆಂಥ ನಿರ್ಬಂಧಗಳಿಗೂ ಬಗ್ಗದೇ ಔಷಧಿಗಳ ಬೆಲೆಗಳು ಹೆಮ್ಮಾರಿಯಂತೆ ಬೆಳೆದು ನಿಂತಿವೆ. ಸದ್ದಿಲ್ಲದೇ ಏರುತ್ತಲೇ ಇವೆ. ಔಷಧಿಗಳ ಬೆಲೆಗಳ ಏರಿಕೆಯಾಗಿದೆ ಎಂದು ಎಲ್ಲಾದರೂ ಪ್ರತಿಭಟನೆ ನಡೆದಿದೆಯೇ? ಎಲ್ಲಾದರೂ ಔಷಧಿ ತಯಾರಕರ ದುಷ್ಟ ಲಾಭಿಯ ವಿರುದ್ಧ ಯಾರಾದರೂ ಸೆಟೆದು ನಿಂತಿದ್ದಾರೆಯೇ? ಊಹೂಂ. ಇಲ್ಲವೇ ಇಲ್ಲ. ಯಾವ ಅಡೆತಡೆ ಇಲ್ಲದೆಯೇ ಅವ್ಯಾಹತವಾಗಿ ನಡೆಯುತ್ತಲೇ ಇದೆ. ನಿಜವಾದ ಅರ್ಥದಲ್ಲಿ ’ಸೂರ್ಯ ಮುಳುಗದ ಸಾಮ್ರಾಜ್ಯ’ ಎಂದರೆ- ಔಷಧೋದ್ಯಮ ಸಾಮ್ರಾಜ್ಯವೇ ಆಗಿದೆ.

ಮಹಾತ್ಮಾ ಗಾಂಧೀಜಿ ಅವರು ವಿದ್ಯೆ, ಆಹಾರ ಮತ್ತು ಔಷಧಿಗಳು ದೇಶದ ಸರ್ವ ಜನರಿಗೂ ಉಚಿತವಾಗಿ ಸಿಗಬೇಕು ಎಂದು ಹೇಳಿದ್ದರು. ಅದು ಅವರ ಕನಸಾಗಿತ್ತು. ಆದರೆ, ಅವರು ಸತ್ತು ಹೋದ ೬೩ ವರ್ಷಗಳಲ್ಲಿಯೇ ಈ ದೇಶದಲ್ಲಿ ಈ ಮೂರೂ ಕ್ಷೇತ್ರಗಳು ಭಾರೀ ವಾಣಿಜ್ಯೀಕರಣಗೊಂಡಿವೆ. ವಿದ್ಯೆ, ಆಹಾರ ಮತ್ತು ಔಷಧಿಗಳನ್ನು ಈಗ ಎಲ್ಲರಿಗೂ ಉಚಿತವಾಗಿ ಒದಗಿಸಬೇಕು ಎಂದು ಹೇಳಿದರೆ, ನಿಮ್ಮನ್ನು ’ಹುಟ್ಟಲಿಲ್ಲ’ ಎನ್ನಿಸಿ ಬಿಡುತ್ತಾರೆ!! ವಿದ್ಯೆ ಒದಗಿಸುವ ದೊಡ್ಡ ದೊಡ್ಡ ಕಾರ್ಪೋರೇಟ್ ಸಂಸ್ಥೆಗಳು, ಆಹಾರೋದ್ಯಮ (ಹೋಟೆಲ್ ಉದ್ಯಮ ಸೇರಿದಂತೆ) ಮತ್ತು ಔಷಧಿ ತಯಾರಿಕೆ ಮಾಡುವ ಕಂಪೆನಿಗಳೆಲ್ಲ ನಿಮ್ಮ ಮೇಲೆ ಮುಗಿ ಬೀಳುತ್ತವೆ. ಹೀಗೆ ಭಾರಿ ಪ್ರಮಾಣದಲ್ಲಿ ವಾಣಿಜ್ಯೀಕೃತಗೊಂಡಿರುವ ಔಷಧೋದ್ಯಮದ ಹಿಂದೆ ಬಲಿಷ್ಠ ಕೈಗಳ ಕೈವಾಡವಿದೆ ಎಂಬುದನ್ನು ಬಿಡಿಸಿ ಹೇಳಬೇಕಾಗಿಲ್ಲ.

ಯಾಕೆ ಇಷ್ಟೊಂದು ಬೆಲೆ?

ಔಷಧಿಗಳ ಯಾಕೆ ಇಷ್ಟೊಂದು ದುಬಾರಿ? ಎಂದು ಕೇಳಿದರೆ ನೂರು ಕಾರಣಗಳನ್ನು ಹೇಳುತ್ತಾರೆ. ನಿರ್ದೇಶಿತ ಔಷಧಿ (ಪ್ರಿಸ್ಕ್ರಿಪ್ಶನ್ ಡ್ರಗ್ಸ್) ಉತ್ಪಾದನಾ ಕಂಪೆನಿಗಳ ದುರಾಸೆಯೇ ಇದಕ್ಕೆ ಮೂಲ ಕಾರಣ ಎಂಬುದು ಸ್ಪಷ್ಟ. ಔಷಧಿಗಳನ್ನು ಕೊಳ್ಳಲು ಮುಖ್ಯವಾಗಿ ’ಜೀವಭಯ’ ಸುಪ್ತವಾಗಿ ಕೆಲಸ ಮಾಡುತ್ತದೆ. ಅದರ ನಂತರದ್ದು ತಕ್ಷಣದ ಆರೋಗ್ಯದ ವಿಚಾರ. ಹೀಗಾಗಿ ಔಷಧಿ ಕೊಳ್ಳುಗರಲ್ಲಿ ಯಾವುದೇ ’ಮೀನ ಮೇಷ’ ಎಣಿಸುವ ಪ್ರಮೇಯ ಬರುವುದಿಲ್ಲ. ಮೊದಲು ಆರಾಮಾದರೆ ಸಾಕಪ್ಪ ಎಂಬ ಭಾವವೊಂದೇ ಸ್ಥಾಯಿಯಾಗಿರುತ್ತದೆ. ’ಬದುಕಿದ್ದರೆ ಮುಂದೆ ಬೇಕಾದಷ್ಟು ದುಡ್ಡು ಸಂಪಾದಿಸಬಹುದು’ ಎಂಬ ಭಾವನೆ ಮುಂಚೂಣಿಗೆ ಬಂದು ಔಷಧಿ ಕೊಳ್ಳಲು ಯಾರೂ ಹಿಂದೆ ಮುಂದೆ ನೋಡುವುದಿಲ್ಲ.

ಈ ಭಾವನೆಯನ್ನೇ ಡ್ರಗ್ಸ್ ಉತ್ಪಾದನಾ ಕಂಪೆನಿಗಳು ದುರ್ಬಳಕೆ ಮಾಡಿಕೊಳ್ಳುತ್ತಿರುವುದು ಸುಸ್ಪಷ್ಟ. ಹೀಗಾಗಿ ದಿನ, ವಾರ, ತಿಂಗಳುಗಳ ಲೆಕ್ಕದಲ್ಲಿ ಔಷಧಿಗಳ ಬೆಲೆಗಳನ್ನು ಸದ್ದಿಲ್ಲದೇ ಏರಿಕೆ ಮಾಡಲಾಗುತ್ತಿದೆ. ಗ್ರಾಹಕರ ಉತ್ಪನ್ನಗಳಿಗಿಂತ ಭಾರಿ ವೇಗದಲ್ಲಿ ಔಷಧಿಗಳ ಬೆಲೆಗಳು ಏರುತ್ತಿವೆ. ತೈಲ ಬೆಲೆಗಳನ್ನು ಏರಿಕೆ ಮಾಡಿದರೆ ಸಂಸತ್ತಿನಲ್ಲಿ ಭಾರೀ ಕೋಲಾಹಲ ಉಂಟಾಗುತ್ತದೆ. ಬೀದಿ ಬೀದಿಗಳಲ್ಲಿ ಹರತಾಳಗಳು, ಪ್ರತಿಭಟನೆಗಳು ನಡೆದು ಜನರು ತೈಲ ಬೆಲೆ ಏರಿಕೆ ಮಾಡುವ ಸರ್ಕಾರದ ಕ್ರಮಕ್ಕೆ ಛೀ- ಥೂ ಎನ್ನುತ್ತಾರೆ. ಆದರೆ, ಸದ್ದಿಲ್ಲದೇ ಏರುವ ಈ ಔಷಧಿಗಳ ಬಗ್ಗೆ ಸಾರ್ವಜನಿಕರು ಪ್ರತಿಕ್ರಿಯಿಸುವುದೇ ಇಲ್ಲ. ಹಾಗೊಂದು ಸಲ ಪ್ರತಿಕ್ರಿಯಿಸಬೇಕು ಎಂದರೆ ಬೆಲೆ ಏರಿಕೆ ವಿಚಾರ ಗೊತ್ತೇ ಆಗುವುದಿಲ್ಲ. ಗೊತ್ತಾದರೂ ಅದು ಅವರ ದೈನಂದಿನ ಜೀವನವನ್ನು ಅಷ್ಟೊಂದು ಪ್ರಖರವಾಗಿ ತೊಂದರೆಗೀಡು ಮಾಡುವುದಿಲ್ಲ. ಸಂಸತ್ತಿನಲ್ಲಿ, ಶಾಸನ ಸಭೆಗಳಲ್ಲಿಯೂ ಯಾರೂ ಈ ಬಗ್ಗೆ ಚಕಾರ ಎತ್ತುವುದಿಲ್ಲ. ಆದ್ದರಿಂದ ಔಷಧಿ ಕಂಪೆನಿಗಳಿಗೆ ಮನಬಂದಂತೆ ಔಷಧಿಗಳ ಬೆಲೆ ಏರಿಸಲು ಏನೂ ಅಡ್ಡಿ ಆತಂಕಗಳಿಲ್ಲ. ಸಾರ್ವಜನಿಕರು ಬಹಿಷ್ಕಾರ ಹಾಕುತ್ತಾರೆಂಬ ಭಯವಿಲ್ಲ. ಸರ್ಕಾರಗಳು ಏನಾದರೂ ಕ್ರಮ ಕೈಗೊಂಡು ಬೆಲೆ ಏರಿಕೆ ಮಾಡುವ ಕಂಪೆನಿ ವಿರುದ್ಧ ಕ್ರಮ ಕೈಗೊಳ್ಳುತ್ತವೆ ಎಂಬ ಭಯವಿಲ್ಲ.

ಕೇಂದ್ರ ಸರ್ಕಾರಿ ನೌಕರರು ಸಿಜಿಎಚ್‌ಎಸ್ (ಕೇಂದ್ರ ಸರ್ಕಾರದ ಆರೋಗ್ಯ ಯೋಜನೆ) ಅಡಿ ಬರುವ ಕಾರಣ ಅವರು ಆಸ್ಪತ್ರೆ ಬಿಲ್ ಬಗ್ಗೆ ಯೋಚನೆ ಮಾಡುವುದಿಲ್ಲ. ರಾಜ್ಯ ಸರ್ಕಾರಿ ನೌಕರರೂ ಕೂಡ ಆರೋಗ್ಯ ಯೋಜನೆಯಡಿ ಬರುವ ಕಾರಣ ಅವರು ಖರ್ಚು ಮಾಡಿದ ಬಹುಭಾಗ ಹಣವು ಮರಳಿ ಬರುತ್ತದೆ. ಆದ್ದರಿಂದ ಬಹುಸಂಖ್ಯಾತ ಸರ್ಕಾರಿ ನೌಕರರು ಔಷಧಿಗಳ ಬೆಲೆ ಏರಿಕೆ ಬಗ್ಗೆ ತಲೆ ಕೆಡಿಸಿಕೊಳ್ಳುವುದಿಲ್ಲ. ಇನ್ನು ಪ್ರಮುಖ ಖಾಸಗಿ ಸಂಸ್ಥೆಗಳೂ ಕೂಡ ತಮ್ಮ ನೌಕರರಿಗೆ ವೈದ್ಯಕೀಯ ಮರುಪಾವತಿ ಯೋಜನೆ ಹಮ್ಮಿಕೊಂಡಿರುತ್ತವೆ. ಕೆಲವು ಸಂಸ್ಥೆಗಳು ತಮ್ಮದೇ ಆದ ವೈದ್ಯಕೀಯ ವ್ಯವಸ್ಥೆ ಹೊಂದಿರುತ್ತವೆ. ಹೀಗಾಗಿ ಅವರೂ ತಲೆ ಕೆಡಿಸಿಕೊಳ್ಳುವುದಿಲ್ಲ. ಅಂತಿಮವಾಗಿ ಅಸಂಘಟಿತ ವಲಯದಲ್ಲಿರುವ ಕಾರ್ಮಿಕರು ಮತ್ತು ಇತರ ಶಕ್ತಿರಹಿತ (ಸಂಘಟನೆ ಮತ್ತು ರಾಜಕೀಯ) ವರ್ಗದ ಜನರಿಗೆ ಇವುಗಳ ವಿರುದ್ಧ ದನಿ ಎತ್ತಲು ಸಾಧ್ಯವಿಲ್ಲ. ಅಥವಾ ಈ ಕ್ಷೇತ್ರದಲ್ಲಿ ಯಾರ ವಿರುದ್ಧ ಮಾತಾಡಬೇಕು ಎಂಬುದೂ ಗೊತ್ತಾಗದ ಪರಿಸ್ಥಿತಿ ಇದೆ. ಹೀಗಾಗಿ ಔಷಧಿಗಳ ಬೆಲೆ ಏರಿಕೆ ಬಗ್ಗೆ ಯಾರೂ ತಲೆ ಕೆಡಿಸಿಕೊಳ್ಳುವ ಸ್ಥಿತಿ ಇಲ್ಲ. ಔಷಧಿ ಕೊಂಡುಕೊಳ್ಳಲು ಅಂಗಡಿಗೆ ಹೋದಾಗ, ’ಅಯ್ಯೋ ದೇವರೇ! ಔಷಧಿಗಳ ಬೆಲೆ ಇಷ್ಟೊಂದು!!’ ಎಂದು ಕಣ್ಣರಳಿಸಿ ಬರುವುದಷ್ಟೇ ಉಳಿದಿರುವ ಕೆಲಸ.

ಔಷಧಿಗಳ ಸಂಶೋಧನೆಗೆ ಭಾರಿ ಪ್ರಮಾಣದ ಹಣ ಖರ್ಚಾಗುತ್ತದೆ. ಸಂಶೋಧನೆಗೆ ಅತಿ ಹೆಚ್ಚು ಸಮಯ ಮತ್ತು ಹಣ ಬೇಕಾಗುತ್ತದೆ ಎಂಬ ಅಂಶವೂ ಕೂಡ ಔಷಧಿಗಳ ವಿಪರೀತ ಬೆಲೆಗೆ ಕಾರಣ. ಕಂಪೆನಿಗಳು ಸಂಶೋಧನೆಗಾಗಿ ಪ್ರತಿ ವರ್ಷ ಬಿಲಿಯಾಂತರ ಡಾಲರ್ ಹಣ ಹೂಡುತ್ತವೆ. ಎರಡನೇ ಅಂಶವೆಂದರೆ- ಗ್ರಾಹಕರ ಮನೆಗೆ ಔಷಧಿಗಳನ್ನು ತಲುಪಿಸುವುದಕ್ಕಾಗಿ ಜಾಹೀರಾತುಗಳ ಪೈಪೋಟಿ. ಜಾಹೀರಾತುಗಳ ಮೇಲೆ ಮಿಲಿಯಗಟ್ಟಲೇ ಹಣ ಸುರಿಯುತ್ತವೆ ಕಂಪೆನಿಗಳು. ರೋಗಿಗಳಿಗೆ ಔಷಧಿಗಳ ನಿರ್ದೇಶನ ಮಾಡುವ ಮೂಲ ಪುರುಷರೆಂದರೆ ಮಹಾಮಹಿಮರಾದ ವೈದ್ಯರೇ ಆಗಿದ್ದಾರೆ. ಈ ವೈದ್ಯರ ಮೇಲೆ ಪ್ರಭಾವ ಬೀರಲು ಔಷಧ ತಯಾರಕ ಕಂಪೆನಿಗಳು ಏನೆಲ್ಲಾ ಸಾಹಸ ಮಾಡಿ, ಅವರ ಮೇಲೆ ಕೋಟ್ಯಂತರ ಡಾಲರ್ ವ್ಯಯ ಮಾಡುತ್ತವೆ.

ಔಷಧಿಗಳ ಸಂಶೋಧನೆ (ರೀಸರ್ಚ್ & ಡೆವಲಪ್‌ಮೆಂಟ್), ಮಾರುಕಟ್ಟೆಗಳನ್ನು ತಮ್ಮ ವಶಕ್ಕೆ ತೆಗೆದುಕೊಳ್ಳಲು ಮಾಡುವ ಜಾಹೀರಾತು ಸಮರ- ಇತ್ಯಾದಿಗಳ ನಂತರದ ಖರ್ಚಿನ ಮೂಲವೆಂದರೆ ಪೇಟೆಂಟ್‌ಗಳದ್ದು. ಪೇಟೆಂಟ್ ಪಡೆದುಕೊಳ್ಳಲು ದೊಡ್ಡ ದೊಡ್ಡ ಔಷಧಿ ತಯಾರಕ ಕಂಪೆನಿಗಳು ಕೋಟ್ಯಂತರ ಡಾಲರ್ ಹಣ ಸುರಿದು ಪೇಟೆಂಟ್ ಪಡೆದುಕೊಳ್ಳುತ್ತವೆ. ಅಂತಹ ಕಂಪೆನಿಗಳು ದೊಡ್ಡ ದಂಡೇ ಆಗಿದ್ದು, ಅವುಗಳು ಎಲ್ಲ ದೇಶಗಳ ಸರ್ಕಾರಗಳ ಮೇಲೂ ತಮ್ಮ ಪ್ರಭಾರ ಬೀರಿ, ಪೇಟೆಂಟ್ ಪಡೆಯದ ಔಷಧಿಗಳ (ಇಂಥ ಔಷಧಿಗಳನ್ನು ’ಜನರಿಕ್’ ಔಷಧಿಗಳೆಂದು ಕರೆಯುತ್ತಾರೆ) ವಿರುದ್ಧ ಪಿತೂರಿ ಮಾಡಿ, ಅವುಗಳನ್ನು ನಕಲಿ ಔಷಧಿಗಳೆಂದು ಬಿಂಬಿಸುತ್ತಿವೆ. ಹೀಗಾಗಿ ಜನರಿಕ ಔಷಧಿಗಳನ್ನು ತಯಾರಿಸುವ ಅತಿ ದೊಡ್ಡ ದೇಶವೆಂದರೆ ಭಾರತವೇ ಆಗಿದೆ.

ಬೌದ್ಧಿಕ ಆಸ್ತಿ ಹಕ್ಕುಗಳ (ಟ್ರೇಡ್ ರಿಲೇಟೆಡ್ ಆಸ್ಪೆಕ್ಟ್ಸ್ ಆಫ್ ಇಂಟೆಲೆಕ್ಚುವಲ್ ಪ್ರಾಪರ್ಟಿ ರೈಟ್ಸ್) ಉಲ್ಲಂಘನೆ ಮಾಡಿವೆ ಎಂದು ಬೊಬ್ಬೆ ಹೊಡೆದು ಇಂಥ ಜನರಿಕ್ ಔಷಧಿಗಳನ್ನು ನಿಷೇಧಿಸುವಂತೆ ವಿಶ್ವ ವ್ಯಾಪಾರ ಸಂಸ್ಥೆ (ಡಬ್ಲ್ಯೂಟಿಒ) ಮತ್ತು ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯೂಎಚ್‌ಒ)ಗಳ ಮೇಲೆ ಒತ್ತಡ ತರುತ್ತವೆ. ಆದ್ದರಿಂದ ಅಗ್ಗದ ದರಕ್ಕೆ ಸಿಕ್ಕುವ ಜನರಿಕ್ ಔಷಧಿಗಳು ಮಾರಾಟವಾಗದಂತೆ ದೊಡ್ಡ ಕಂಪೆನಿಗಳು ತಡೆಯುತ್ತಿವೆ. ಅಲ್ಲದೇ, ಈಗಾಗಲೇ ಕೀನ್ಯಾ, ಮೊರಾಕ್ಕೊ, ಮೆಕ್ಸಿಕೊ ಮತ್ತು ಸಿಂಗಾಪುರಗಳಲ್ಲಿ ಇಂಥ ಜನರಿಕ್ ಔಷಧಿಗಳನ್ನು ನಕಲಿ ಔಷಧಿಗಳೆಂದು ಹೇಳಿ ಅವುಗಳ ಮೇಲೆ ನಿರ್ಬಂಧ ವಿಧಿಸುವ ಕಾನೂನು ಜಾರಿಗೊಳಿಸುವಲ್ಲಿ ಇವು ಯಶಸ್ವಿಯಾಗಿವೆ.

ಪೇಟೆಂಟ್ ಎಂಬ ರಾಕ್ಷಸ ಜಾಲ:

ನಕಲಿ ಔಷಧಿ ವಿರೋಧಿ ಕಾನೂನು ಜಾರಿಗೊಳಿಸಲಾದ ಮತ್ತು ಜಾರಿಗೆ ಹಂತದಲ್ಲಿರುವ ದೇಶಗಳಲ್ಲೆಲ್ಲ ಅಗ್ಗದ ದರದ ಮತ್ತು ಪೇಟೆಂಟ್ ಇಲ್ಲದ ಜನರಿಕ್ ಔಷಧಿಗಳನ್ನು ಆಮದು ಮಾಡಿಕೊಳ್ಳಲಾಗುವುದಿಲ್ಲ. ಇದೊಂದು ವ್ಯವಸ್ಥಿತ ಜಾಲವಾಗಿದ್ದು, ಉತ್ತಮ ಗುಣಮಟ್ಟದ ಔಷಧಿಗಳು ಲಭ್ಯ ಇದ್ದರೂ ಅವುಗಳಿಗೆ ಪೇಟೆಂಟ್ ಇಲ್ಲ ಎಂಬ ಕಾರಣಕ್ಕೆ ಅವುಗಳು ನಕಲಿ ಔಷಧಿಗಳಾಗುತ್ತಿವೆ. ಆದ್ದರಿಂದ ಜನರು ಅನಿವಾರ್ಯವಾಗಿ ಪೇಟೆಂಟ್ ಇರುವ ಔಷಧಿಗಳನ್ನೇ ಕೊಳ್ಳಬೇಕಾಗುತ್ತಿದೆ. ಪೇಟೆಂಟ್ ಉಳ್ಳ ಔಷಧಿಗಳು ಸಹಜವಾಗಿ ದುಪ್ಪಟ್ಟು ಬೆಲೆ ಹೊಂದಿರುತ್ತವೆ. ಕೆಲವು ಜೀವ ರಕ್ಷಕ ಔಷಧಿಗಳು ಜನರಿಕ್ ಔಷಧಿಗಳಿಗಿಂತ ಶೇ. ೩೦೦ರಿಂದ ಶೇ. ೪೦೦ ಪಟ್ಟು ಜಾಸ್ತಿ ಬೆಲೆ ಹೊಂದಿರುತ್ತವೆ. ವೈದ್ಯರೂ ಕೂಡ ಅಂಥದ್ದೇ ಔಷಧಿಗಳನ್ನು ರೋಗಿಗಳಿಗೆ ನಿರ್ದೇಶಿಸಬೇಕು ಎಂಬ ಒತ್ತಡಕ್ಕೊಳಗಾಗಿರುತ್ತಾರೆ. ಆದ್ದರಿಂದ ಅನಿವಾರ್ಯವಾಗಿ ರೋಗಿಗಳು ದುಬಾರಿ ಬೆಲೆ ತೆರಬೇಕಾಗಿದೆ. ಇದು ಪೇಟೆಂಟ್ ಎಂಬ ಭೂತದಿಂದಾಗಿಯೇ ಹೊರತು ಬೇರೇನಕ್ಕೂ ಅಲ್ಲ. ಒಂದು ಬಾರಿ ಔಷಧಿ ಕಂಡು ಹಿಡಿದು ಅದು ಮಾನವ ಉಪಕಾರಕ್ಕಾಗಿ ಬಳಕೆಯಾಗಲಿ ಎಂಬ ದೊಡ್ಡ ಮನಸ್ಸು ಈ ಕಂಪೆನಿಗಳಿಗೆ ಇರುವುದಿಲ್ಲ. ಬದಲಾಗಿ ಬೇರಾರೂ ಈ ಔಷಧಿ ತಯಾರಿಸಿ ಮಾರಬಾರದು; ಅದು ನನ್ನ ಕಂಪೆನಿಗೇ ಬರಬೇಕು ಎಂಬ ಲೆಕ್ಕಾಚಾರ ಇರುತ್ತದೆ? ಇರಲಿ- ಸಂತೋಷ. ಆದರೆ, ಅಂಥ ಔಷಧಿಗಳನ್ನು ತಯಾರಿಸಿದ ಕಂಪೆನಿಗೆ ದೊಡ್ಡ ಮಟ್ಟದಲ್ಲಿ ಲಾಭ ಗಳಿಸುವ ದುರಾಸೆ ಇರುತ್ತದೆ. ಇದರಿಂದ ಔಷಧಿಯ ಬೆಲೆಗಳು ಇನ್ನೂ ಹೆಚ್ಚು ’ತೂಕ’ದ್ದವುಗಳಾಗಿ ಬಡವರ ರಕ್ತ ಹೀರುತ್ತವೆ.

ಔಷಧಿ ಬೆಲೆ ನಿಯಂತ್ರಣ ಮಾಡುವುದಕ್ಕೆ ಸಂಬಂಧಿಸಿದಂತೆ ಎಷ್ಟೆಲ್ಲ ದೇಶಗಳಲ್ಲಿ ಕಾನೂನುಗಳು ಜಾರಿಯಲ್ಲಿವೆ. ಅಮೆರಿಕದ ಬರಾಕ್ ಒಬಾಮಾ ಆಡಳಿತವು ೨೦೦೯ರ ಮಾರ್ಚ್ ೨೪ರಂದು ಪೇಶೆಂಟ್ ಪ್ರೊಟೆಕ್ಷನ್ & ಅಫೋರ್ಡೇಬಲ್ ಆಕ್ಟ್ ಅನ್ನು ಪಾಸು ಮಾಡಿತು. ಇಂಥ ಕಾನೂನುಗಳು ಹಲವಾರು ದೇಶಗಳಲ್ಲಿ ಜಾರಿಯಲ್ಲಿದ್ದರೂ ಸರ್ಕಾರಗಳು ಔಷಧಿಗಳ ಬೆಲೆ ನಿಯಂತ್ರಣ ಮಾಡುವುದನ್ನು ಔಷಧಿ ಕಂಪೆನಿಗಳು ವಿರೋಧಿಸುತ್ತವೆ. ಔಷಧಿಗಳ ಸಂಶೋಧನೆಗೆ ಅಪಾರ ಖರ್ಚಾಗುತ್ತದೆ, ಅವುಗಳ ಪೇಟೆಂಟ್ ಪಡೆಯುವುದು, ಜನಪ್ರಿಯಗೊಳಿಸುವುದು, ಸಾಗಣೆ ವೆಚ್ಚ- ಮುಂತಾದ ಕಾರಣಗಳಿಗಾಗಿ ಖರ್ಚು ಹೆಚ್ಚಾಗುತ್ತದೆ. ಒಂದು ವೇಳೆ ಸರ್ಕಾರಗಳು ಬೆಲೆಗಳ ನಿಯಂತ್ರಣ ಮಾಡಿದರೆ, ಸಂಶೋಧನೆ ಮತ್ತು ಅಭಿವೃದ್ಧಿಯ ಮೇಲೆ ಮಾಡುವ ಖರ್ಚು ಕಡಿಮೆಯಾಗಿ, ಗುಣಮಟ್ಟ ಕುಸಿತ ಉಂಟಾಗುತ್ತದೆ ಎಂದು ಅವು ಬೊಬ್ಬೆ ಹೊಡೆಯುತ್ತವೆ. ಆದ್ದರಿಂದ ಹೆಚ್ಚಿನ ಬೆಲೆ ಇಡುವುದು, ಅದಕ್ಕೆ ಬೇಕಾದರೆ ಸರ್ಕಾರ ಸಬ್ಸಿಡಿ ಕೊಡಲಿ ಎಂಬ ವಾದ ಕಂಪೆನಿಗಳದ್ದು. ಇದು ಎಲ್ಲರೂ ಒಪ್ಪುವಂಥ ವಾದವಲ್ಲ ಎಂಬುದು ಶತಃಸಿದ್ಧ.

ಇಂಥ ಕಂಪೆನಿಗಳು ಯಾವಾಗಲೂ ಶ್ರೀಮಂತರ ಪರ ಇರುತ್ತವೆ ಮತ್ತು ಅವರ ಹಿತರಕ್ಷಣೆ ಮಾಡಲು ಬದ್ಧವಾಗಿರುತ್ತವೆ ಎಂಬುದನ್ನು ನಾವಿಲ್ಲಿ ಒತ್ತಿ ಹೇಳಬೇಕಾಗಿಲ್ಲ. ದುರ್ದೈವ ಎಂದರೆ ಇಂಥ ಔಷಧಿಗಳ ಹಿಂದಿನ ಕುತಂತ್ರದ ಬಗ್ಗೆ ಬಗ್ಗೆ ಯಾರಿಗೂ ಕಾಳಜಿಯೇ ಇಲ್ಲವಲ್ಲ? ಎಂಬುದೇ ಇಲ್ಲಿನ ಕಳಕಳಿ ಅಷ್ಟೇ.


ಸುಖೀ ಸಂಸಾರ

ಏಪ್ರಿಲ್ 17, 2009

ಜಾಗತೀಕರಣ ನಮ್ಮ ಮುಂದೆ ಇರುವ ದೊಡ್ಡ ಪೆಡಂಭೂತ. ಅದು ಒಂದೊಂದಾಗಿ ಎಲ್ಲವನ್ನೂ ಆಹುತಿ ತೆಗೆದುಕೊಳ್ಳುತ್ತಿದೆ. ನಮಗರಿವಿಲ್ಲವೇ ನಾವು ಆ ಮಹಾ ಕೂಪದೊಳಕ್ಕೆ ಸೆಳೆಯಲ್ಪಟ್ಟು, ಎಲ್ಲಿಗೋ ಹೋಗುತ್ತಿದ್ದೇವೆ. ಎಲ್ಲಿಗೆ ಪಯಣ? ಯಾವುದು ದಾರಿ ಎಂಬುದೇ ಗೊತ್ತಿಲ್ಲ. ಈ ದಿಸೆಯಲ್ಲಿ ನನ್ನ ಪ್ರೀತಿಯ ಮೇಷ್ಟ್ರು, ಮೈಸೂರಿನ ವಿ.ಎನ್. ಲಕ್ಷ್ಮಿನಾರಾಯಣ ಅವರು ಬರೆದ ಒಂದು ಸಣ್ಣ ಕಥೆಯನ್ನು ಇಲ್ಲಿ ಕೊಡಲಾಗಿದೆ. ಇನ್ನು ಮುಂದೆ ಆಗಾಗ ಮೇಷ್ಟ್ರು ಇಂಥ ಅನೇಕ ಕಥೆ, ಲೇಖನ, ಬರಹಗಳ ಮೂಲಕ ‘ತಾರೆಗಳಾಚೆ’ ಬೆಳಗಲಿದೆ.

ಇದೋ ನಿಮಗಾಗಿ- ಮೇಷ್ಟ್ರು ವಿಎನ್ಎಲ್ ಅವರ ಕಥೆ:

ಸುಖೀ ಸಂಸಾರ

ಒಂದೂರಿನಲ್ಲಿ ಒಬ್ಬ ಗಂಡ, ಹೆಂಡತಿ ಮತ್ತು ಒಂದು ಮಗು ವಾಸವಾಗಿದ್ದರು. ತಾತನ ಕಾಲದ ಒಂದು ಸಣ್ಣ ಮನೆ. ಮನೆಯ ಮುಂದೆ ಎರಡು ತೆಂಗಿನ ಮರ. ಹಿತ್ತಿಲಲ್ಲಿ ಬಾಳೆ. ಸೀಬೆಮರ. ಗಂಡನಿಗೆ ಯಾವುದೋ ಒಂದು ಆಫೀಸಿನಲ್ಲಿ ಕೆಲಸ. ಹೆಂಡತಿಗೆ, ತಿಂಡಿ, ಅಡಿಗೆ ಊಟ, ಕಸ ಮುಸುರೆ ಮುಂತಾಗಿ ಮಾಡಿದ್ದೆ ಕೆಲಸ. ಬೇಜಾರಾದರೆ ಕಸೂತಿ ಹಾಕುವುದು, ಮ್ಯಾಗಝೈನ್ ಓದುವುದು, ಪಕ್ಕದ ಮನೆಯ ವರ ಜೊತೆ ಹರಟೆ ಹೊಡೆಯುವುದು, ಗಂಡ-ಮಗಳೊಂದಿಗೆ ಸಿನಿಮಾಕ್ಕೆ ಹೋಗುವುದು, ಅಥವಾ ಬೇಜಾರು ಕಳೆಯಲು ಏನೇನು ಮಾಡಲು ಸಾಧ್ಯವೋ ಅದೆಲ್ಲಾ. ಮನೆಯ ಹತ್ತಿರವೇ ಗೌರ್ಮೆಂಟ್ ಸ್ಕೂಲು, ತರಕಾರಿ ಮಾರ್ಕೆಟ್ಟು, ಇಸ್ತ್ರಿ ಅಂಗಡಿ. ಇನ್ನೇನು ಬೇಕು?

ಪಕ್ಕದ ಮನೆಯಲ್ಲಿ ಹಳೆಯ ರೇಡಿಯೋವನ್ನು ಕೊಟ್ಟು ಹೊಸದೊಂದು ಟಿವಿ ತಂದರು. ಮಗಳು ಟಿವಿನೋಡಬೇಕೆಂದು ಹಟಮಾಡಿದಳು. ಎನೋ ಮಗು ಕೇಳುತ್ತಲ್ಲಾ ಎಂದು ಪಕ್ಕದ ಮನೆಗೆ ಕಳಿಸಿದಳು. ಪಕ್ಕದ ಮನೆಯವರು ತುಂಬಾ ಒಳ್ಳೆಯವರು. ಮಗುವಿಗೆ ಟಿವಿ ತೋರಿಸಿ, ತಿಂಡಿ ಕೊಟ್ಟು, ನಿದ್ದೆ ಬಂದರೆ ಅಲ್ಲೇ ಮಲಗಿಸಿರುತ್ತಿದ್ದರು. ಎಷ್ಟು ಹೊತ್ತಾದರೂ ಮಗಳು ಬಾರದಿದ್ದಾಗ ತಾಯಿಯೇ ಪಕ್ಕದ ಮನೆಗೆ ಓಡಿ ಪಕ್ಕದ ಮನೆಯವರ ಬಲಾತ್ಕಾರಕ್ಕೆ ಒಂದು ನಿಮಿಷ ಕುಳಿತು ಟಿವಿ ನೋಡಿದಳು. ತುಂಬಾ ಚನ್ನಾಗಿದೆ ಎನ್ನಿಸಿತು. ಹೆಂಡತಿ ಎಷ್ಟು ಹೊತ್ತಿಗೂ ಬಾರದಿದ್ದಾಗ ಕಾದೂ ಕಾದೂ ಸುಸ್ತಾದ ಗಂಡ ಪಕ್ಕದ ಮನೆಯ ಕಿಟಕಿಯ ಬಳಿ ಬಂದು ಕೆಮ್ಮಿದ. ಒಳಗಿದ್ದ ಮನೆಯ ಯಜಮಾನ ಬನ್ನಿ ಬನ್ನಿ ಎಂದು ಗಂಡನನ್ನು ಒಳಗೆ ಕರೆದರು. ಗಂಡನೂ ಅವರ ಬಲವಂತಕ್ಕೆ ಸ್ವಲ್ಪ ಹೊತ್ತು ಟಿವಿ ನೋಡಿದ. ಅವನಿಗೂ ಟಿವಿ ತುಂಬಾ ಇಷ್ಟವಾಯಿತು.

ಗಂಡ ಹೆಂಡತಿ ಒಂದು ಟಿವಿ ಕೊಂಡುಕೊಂಡರು. ಹೆಂಡತಿ ಕೆಲಸ ಮುಗಿಸಿ ಟಿವಿ ಮುಂದೆ ಕೂರುವಳು. ಟೀವಿಯೊಳಗಿನ ಸಂಸಾರದ ಎಂದಿಗೂ ಮುಗಿಯದ ಸಮಸ್ಯೆಗಳನ್ನು ನೋಡಿ ಕಣ್ಣೀರು ಹಾಕುವಳು. ಮಗಳು ಸ್ಕೂಲಿಂದ ಬಂದವಳೇ ಟೀವಿಯೊಳಗಿನ ನಾಯಿ ಬೆಕ್ಕುಗಳನ್ನು ನೋಡಿ ಸಂತೋಷಿಸುವಳು. ಗಂಡ ಆಫೀಸಿನಿಂದ ಬಂದವನೇ ಟೀವಿಯೊಳಗಿನ ಪ್ರಪಂಚದಲ್ಲಿ ನಡೆಯುವ ಅನ್ಯಾಯಗಳನ್ನು ನೋಡಿ ಹಲ್ಲು ಕಡಿಯುವನು. ಕೊಲೆಗಳನ್ನು ನೋಡಿ ದಿಗ್ಭ್ರಾಂತನಾಗುವನು. ಕೊನೆಗೆ ಎಲ್ಲರೂ ನಗುತ್ತಾ ಊಟಮಾಡಿ ಮಲಗುವರು.

ಈಚೀಚೆಗೆ ಗಂಡ, ಹೆಂಡತಿ ಮತ್ತು ಮಗಳಿಗೆ ಊಟ ಸರಿಯಾಗಿ ರುಚಿಸುವುದಿಲ್ಲ. ತಿಂದಿದ್ದು ಸರಿಯಾಗಿ ಅರಗುವುದಿಲ್ಲ. ಏನೋ ಕೊರೆ, ಬೇಜಾರು. ಯಾವುದಕ್ಕೂ ಟೈಮೇ ಸಿಗುವುದಿಲ್ಲ. ಯಾರಾದರೂ ಮನೆಗೆ ಬಂದರೆ ಯಾಕಾದರೂ ಬರುತ್ತಾರೋ ಎಂದು ಶಪಿಸುವಂತೆ ಆಗು ತ್ತದೆ. ಬಂದವರೂ ಅಷ್ಟೆ. ಮೊದಲಿನಂತೆ ಹರಟುತ್ತಾ ಕೂರುವುದಿಲ್ಲ. ವಾಚುನೋಡಿಕೊಂಡು ಹೊತ್ತಾಯಿತು ಎಂದು ಹೊರಟು ಬಿಡು ತ್ತಾರೆ. ವಾರಕ್ಕೊಮ್ಮೆ ಹೋಟಲಿಗೆ ಹೋಗೋಣ ಎನ್ನುತ್ತಾನೆ ಗಂಡ. ಅದೇ ದುಡ್ಡಿನಲ್ಲಿ ಮನೆಯಲ್ಲೇ ತಿಂಡಿಮಾಡಿಕೊಂಡು ತಿನ್ನಬಹದಲ್ಲಾ ಅಂತ ಹೆಂಡತಿಗೆ ಅನ್ನಿಸುತ್ತದೆ. ಆದರೂ ಆ ಹೋಟಲಿನಲ್ಲಿ ಮಾಡುವ ಹಾಗೆ ದೋಸೆ ಮಾಡಲು ನಮಗೆಲ್ಲಿ ಸಾಧ್ಯ? ಆದರೆ ಅವರು ಎಲ್ಲ ದಕ್ಕೂ ಸೋಡಾ ಹಾಕುತ್ತಾರೆ. ದುಡ್ಡೂ ಹಾಳು, ಹೊಟ್ಟೆಯೂ ಹಾಳು. ಈ ಹುಡುಗಿ ಬೇರೆ ಹೋಮ್ ವರ್ಕ್ ಸರಿಯಾಗಿ ಮಾಡುವುದಿಲ್ಲ. ಈಗಿನ ಮಕ್ಕಳೇ ಹಾಗೆ. ಸ್ವಲ್ಪವೂ ಜವಾಬ್ದಾರಿಯಿಲ್ಲ. ಓದೇ ಅಂದ್ರೆ ಓದಿದ್ರೆ ತಾನೆ ಮಾರ್ಕ್ಸ್ ಬರೋದು? ಕೇಳಿದ್ದೆಲ್ಲಾ ಕೊಡ್ಸಿದ್ರೂ ಓದು ಮಾತ್ರಾ ಇಲ್ಲ. ಮುಂದೆ ಪೀಯೂಸಿಗೆ ಬಂದ್ಮೇಲೆ ಹ್ಯಾಗೆ? ಬರಿ ಸೀಯೀಟಿ ಪಾಸ್ ಮಾಡಿದ್ರೆ ಸಾಕೆ? ರ್‍ಯಾಂಕ್ ಬರಬೇಡ್ವೆ?

ಕಾಫೀ ಕುಡಿಯುತ್ತಾ ಪ್ರಪಂಚದ ಅನ್ಯಾಯಗಳನ್ನು ಟಿವಿಯಲ್ಲಿ ನೋಡಿ ನೋಡಿ ಕುದಿಯುವ ಗಂಡ. ಹೆಣ್ಣು ಮಕ್ಕಳ ಗೋಳನ್ನು ನೋಡಿ ನೋಡಿ ಬೇಸತ್ತ ಹೆಂಡತಿ, ಕುರ್ ಕುರೆ ತಿನ್ನುತ್ತಾ ಪ್ರಾಣಿಗಳ ಚಿನ್ನಾಟಗಳನ್ನು ನೋಡಿ ಸಂತೋಷಿಸುವ ಮಗಳು, ಎಲ್ಲರೂ ಒಟ್ಟಿಗೆ ಯೋಚಿಸಿ ಒಂದು ತೀರ್ಮಾನಕ್ಕೆ ಬಂದು ಒಂದು ಫ್ರಿಜ್ ಕೊಂಡುಕೊಂಡರು. ಕೋಲ, ಪೆಪ್ಸಿ, ಕುಡಿದು, ಅಯ್‌ಸ್ ಕ್ಯಾಂಡಿ ತಿಂದ ಮೇಲೆ ತಲೆ ಎಷ್ಟೋ ತಂಪಾಯಿತು. ಎಸ್ಟೋ ಸಮಸ್ಯೆಗಳು ತಂತಾನೇ ಬಗೆಹರಿದವು. ಈಗ ವಾರಕ್ಕೊಮ್ಮೆ ಅಡುಗೆ ಮಾಡಿದರೆ ಸಾಕು. ಅಡುಗೆ ಮನೆಯಲ್ಲಿ ಹೆಚ್ಚುಕಾಲ ಕಳೆದಷ್ಟೂ ಆಕ್ಸಿಜನ್ ಕಡಿಮೆ. ಮಗಳನ್ನು ಸ್ಕೂಲಿಗೆ ಕಳಿಸಿ, ಗಂಡನಿಗೆ ಕ್ಯಾರಿಯರ್ ಕಳಿಸಿದ ಮೇಲೆ ಏನು ಕೆಲಸ? ಯಾಕೋ ಜೀವನ ಬರೀ ಬೋರು ಅಂದ್ರೆ ಬೋರು. ಯಾವ್‌ದಾದ್ರೂ ಕೆಲಸಕ್ಕೆ ಸೇರಿಕೊಂಡ್ರೆ ಹ್ಯಾಗೆ? ಕಾಷ್ಮೀರಿ ಪಲಾವ್ ತಿಂದ ಮೇಲೆ ಹೆಂಡತಿ ಗಂಡನನ್ನು ಕೇಳಿದಳು. ಗಂಡ ಒಳ್ಳೇನು. ತುಂಬಾ ಅಂಡರ್‌ಸ್ತ್ಯಾಂಡಿಗ್ ಇರೋ ಮನುಷ್ಯ, ಆಗಲಿ ಮೈ ಡಿಯರ್ ಅಂದ.

ಹೆಂಡತಿ ಈಗ ಸ್ಕೂಲ್ ಟೀಚರ್. ಕೊಟ್ಟಷ್ಟು ಕೊಡ್ಲಿ. ಮಗಳೂ ಅದೇ ಸ್ಕೂಲು. ಆ ದೊಡ್ಡಿ ಸ್ಕೂಲು ಬಿಟ್ಟಿದ್ದೆ ಒಳ್ಳೇದಾಯ್ತು. ಏನೂ ಅಂದ್ರೆ ಏನೂ ಹೇಳ್ಕೊಡಲ್ಲಾ ಅಲ್ಲಿ. ಸುಮ್ನೆ ಕೂಢಾಕ್ಕೊಂಡು ಕೂತಿರ್‍ತಾರೆ ಆ ದರಿದ್ರ ಟೀಚರ್‌ಗಳು. ಆದರೆ ಇಲ್ಲಿ ನೋಡಿ. ಮ್ಯೂಸಿಕ್ಕು, ಡ್ಯಾನ್ಸು, ಕ್ವಿಝ್ಝು ಕಂಪ್ಯೂಟರ್ರು ಎಲ್ಲಾ ಹೇಳ್ಕೊಡ್ತಾರೆ. ಫೀ ಸ್ವಲ್ಪ ಜಾಸ್ತಿ ಅಷ್ಟೆ. ತಂದೆ ತಾಯಿ ದುಡಿಯೋದು ಯಾತಕ್ಕೋಸ್ಕ್ರ, ಮಕ್ಕಳಿಗೇ ತಾನೆ?

ಮೊನ್ನೆ ಸ್ಕೂಲ್ ಡೇ ನಲ್ಲಿ ಮಗಳು ಭಾರತಮಾತೆ ಮೇಕಪ್ ಮಾಡ್ಕೊಂಡು ಡ್ಯಾನ್ಸು ಮಾಡಿದ್ಲು. ಅವರಜ್ಜಿ ಅಂತೂ ನೋಡಿ ತುಂಬಾ ಸಂತೋಷಪಟ್ರು. ಮುಂಡೇದು ಥೇಟು ಐಶ್ವರ್ಯ ರೈ ಕಂಡಹಾಗೇ ಕಾಣ್ತಾ ಇದ್ಲು ಅಂತ ಕಣ್ಣೀರು ಹಾಕ್ಕೊಂಡ್ರು. ಅಂದ್ರೆ ಅಂಥ ಡ್ಯಾನ್ಸನ್ನ ಚಿಕ್ಕೋರ್ ಕೈಲಿ ಮಾಡಿಸ್‌ಬಾರ್‍ದು ಅಷ್ಟೆ. ಆದ್ರೆ ನಮ್ ಕಾಲ್‌ದಲ್ಲಿ ಇದೆಲ್ಲಾ ಎಲ್ಲಿತ್ತು?

ಮೊನ್ನೆ ಟೀಚರ್‍ಸ್ ಎಲ್ಲಾ ಸೇರಿ ಫ್ಯಾಷನ್ ಷೋ ಕೊಟ್ರು. ನನ್ನನ್ನ ಇವರು ರ್‍ಯಾಂಪ್ ಮೇಲೆ ನೋಡಿ ಏನು ಹೇಳಿದ್ರು ಗೊತ್ತಾ? ನಮ್ಮೋಳ್ಗೆ ಇಷ್ಟೆಲ್ಲಾ ಟ್ಯಾಲೆಂಟ್ ಇದೇ ಅಂತಾನೇ ಗೊತ್ತಿರ್‍ಲಿಲ್ಲ. ಅದಕ್ಕೇ ಹೇಳೋದು ಯಾವುದಕ್ಕೂ ಸರಿಯಾದ ಎಕ್ಸಪೋಷರ್ ಬೇಕು ಅಂತ. ಪಾಪ ಆ ಸೀರಿಯಲ್‌ನಲ್ಲಿ ಗಂಡ ಎಷ್ಟು ಹೇಳಿದ್ರೂ ಹೆಂಡತಿ ಅವನ ಮಾತು ಕೇಳಲೇ ಇಲ್ಲ. ನನಗೆ ಆಕ್ಟಿಂಗ್ ಲೈನು ಬೇಡವೇ ಬೇಡ ಅಂತ ಬಂದಿದ್ದ ಪ್ರೊಡ್ಯೂಸರ್‌ನ ಮುಖಕ್ಕೇ ಹೇಳಿ ವಾಪ್ಸು ಕಳಿಸೇಬಿಟ್ಲು! ಅಡ್ವಾನ್ಸ್ ದುಡ್ಡನ್ನ ಗಂಡ ಬಳಸ್ಕ್ಕೊಂಬಿಟ್ಟು ಅದನ್ನ ವಸೂಲು ಮಾಡೋಕೆ ಗೂಂಡಾಗಳು ಬಂದ್ರೂ ಅವಳಿಗೆ ಸ್ವಲ್ಪ್ಪ ಆದ್ರೂ ಕರುಣೆ ಬೇಡ್ವಾ? ತಿಳುವಳಿಕೆ ಬೇಡ್ವಾ? ಅಜ್ಜಿ ನಿಟ್ಟುಸಿರು ಬಿಟ್ಟರು.

ಈಗ ಎಲ್ಲಾ ಕಡೆ ರಸ್ತೆ ಅಗಲ ಮಾಡೋಕೋಸ್ಕ್ರ ಮರಗಳನ್ನ ಕಡೀತಾ ಇದಾರೆ. ಮನೆಗಳನ್ನ ಕೆಡುವುತಾ ಇದಾರೆ. ತಾತನ ಕಾಲದ ಮನೆ ಮಧ್ಯಾನೇ ರಸ್ತೆ ಹೋಗಿದೆ. ಪಾಪ! ಅವರು ತಾನೆ ಏನ್ಮಾಡ್ತಾರೆ ವೆಹಿಕಲ್ಸ್ ಓಡಾಡೋಕೆ ಜಾಗ ಬೇಡ್ವೆ?

ಈಗ, ಗಂಡ, ಹೆಂಡತಿ ಮತ್ತು ಮಗಳು ಹೀಗೆ ಎಲ್ಲರಿಗೂ ಒಂದೊಂದು ಸೋಪ್ ಇದೆ. ಷ್ಯಾಂಪೂ ಇದೆ. ವೆಹಿಕಲ್ ಇದೆ. ಕ್ರೆಡಿಟ್ ಕಾರ್ಡ್ ಇದೆ. ಮೊಬೈಲ್ ಇದೆ. ಅವರದೇ ಆದ ಮೈಂಡ್ ಇದೆ. ಆಸೆ ಆಕಾಂಕ್ಷೆಗಳಿವೆ. ಅಕಸ್ಮಾತ್ ಕಾಯಿಲೆ ಬಿದ್ರೆ ಮೆಡಿಕಲ್ ಇನ್ಷೂರೆನ್ಸ್ ಸಹ ಇದೆ. ಸಾಲವೂ ಇದೆ. ಅಂದರೆ, ಎಲ್ಲರೂ ಸುಖವಾಗಿದ್ದಾರೆ.


ಇನ್ನಷ್ಟು ಸಾಲುಗಳು

ಮಾರ್ಚ್ 11, 2009

ಮಾರುಕಟ್ಟೆಯಲ್ಲಿ ಮಾರುವ ಭರಾಟೆಯಲ್ಲಿ ಕೊಚ್ಚಿಹೋಗಿದೆ ಮಾನವೀಯತೆ!

ಸುಂದರ ಪ್ಯಾಕೆಟ್ ಗಳಂತೆ ಕಾಣುವ ಮುಖಗಳಲ್ಲಿ ಕೃತಕ ನಗೆಯ ಆಡಂಬರ!!

ದಿನವೂ ನಡೆವ ಹಾದಿಯಲ್ಲಿ ಎಲ್ಲವೂ ಗೋಜಲು ಗೋಜಲು.

ಎಲ್ಲ ಕಳೆದುಕೊಂಡ ಮೇಲೂ ಸಹಾಯ ಮಾಡುವುದೊಂದೇ; ಆತ್ಮವಿಶ್ವಾಸ!

ಚಂದ್ರ ಚಂದನ, ಬಾಹು ಬಂಧನ, ಮೃದು ಮಧುರ ಚುಂಬನ- ಎಲ್ಲವೂ ಮಾರಾಟದ ವಸ್ತುಗಳು ಈ ಮಾರುಕಟ್ಟೆ ಯುಗದಲ್ಲಿ!

ವೀರಣ್ಣ


ಅವಳು ಯಾರು ಬಲ್ಲೆ ಏನು?

ಫೆಬ್ರವರಿ 28, 2009

ನಮ್ಮ ಕವಿಗಳು ಅವಳನ್ನು ‘ಅವಳು ಯಾರು ಬಲ್ಲೆ ಏನು’ ಎಂದು ಭಾವನಾತ್ಮಕವಾಗಿ ಕೇಳಿದರು. ಯಕ್ಷಗಾನ ಪ್ರಸಂಗವೊಂದರಲ್ಲಿ ‘ಹುಡುಗಿಯರೆಂದರೆ ಆಧುನಿಕ ಕವಿತೆ ಇದ್ದ ಹಾಗೆ; ನೋಡಲು, ಓದಲು ತುಂಬ ಚೆನ್ನಾಗಿರುತ್ತದೆ; ಆದರೆ ಅರ್ಥವೇ ಆಗುವುದಿಲ್ಲ!’ ಎಂದು ಭಾಗವತರೆಂದರು.

ಬೆಂಗಳೂರಿನ ಸ್ನೇಹಿತ ಬಾಲಚಂದ್ರ ಕೆಲವು ಸಾಲುಗಳನ್ನು ಕಳುಹಿಸಿದ್ದಾರೆ. ನಿಮಗಾಗಿ ಅವುಗಳನ್ನು ಇಲ್ಲಿ ಲೋಡ್ ಮಾಡಿದ್ದೇನೆ. ಓದಿ ಮನದೊಳಕ್ಕೆ ಇಳಿಸಿಕೊಳ್ಳುವುದು ನಿಮಗೆ ಬಿಟ್ಟ ವಿಚಾರ.
ವೀರಣ್ಣ

She is a woman

If you kiss her, you are not a gentleman
If you don’t, you are not a man

If you praise her, she thinks you are lying
If you don’t, you are good for nothing

If you agree to all her likes, you are a wimp
If you don’t, you are not understanding
If you visit her often, she thinks it is boring
If you don’t, she accuses you of double-crossing

If you are well dressed, she says you are a playboy
If you don’t, you are a dull boy

If you are jealous, she says it’s bad
If you don’t, she thinks you do not love her

If you attempt a romance, she says you didn’t respect her
If you don’t, she thinks you do not like her

If you are a minute late, she complains it’s hard to wait
If she is late, she says that’s a girl’s way

If you visit another man, you’re not putting in “quality time”
If she is visited by another woman, “oh it’s natural, we are girls”

If you kiss her once in a while, she professes you are cold
If you kiss her often, she yells that you are taking advantage

If you fail to help her in crossing the street, you lack ethics
If you do, she thinks it’s just one of men’s tactics for seduction

She is a woman If you stare at another woman, she accuses you of flirting
If she is stared by other men, she says that they are just admiring

If you talk, she wants you to listen
If you listen, she wants you to talk

In short:
So simple, yet so complex
So weak, yet so powerful
So damning, yet so wonderful
So confusing, yet so desirable……

-ಬಾಲಚಂದ್ರ ರಂಗನಾಥ್, ಬೆಂಗಳೂರು


ಒಂಟಿ ಸಾಲುಗಳು

ಫೆಬ್ರವರಿ 27, 2009

ಒಂಟಿ ಸಾಲು
(ಒಂದೊಂದೇ ಸಾಲಿನ ’ಸಾಲುಮಂಟಪ’ ಮಂಟಪಗಳಿವು).

* ಬಿದ್ದು ಹೋದ ಕಟ್ಟಡಗಳ ಮೇಲೆ ಪಕ್ಷಿಗಳು ಕುಳಿತಿವೆ, ಸಾಕ್ಷಿ ಪ್ರಜ್ಞೆ ಇಲ್ಲದೇ!!

* ಅವಳೆದೆಯ ಕಾವು ಅರ್ಥವಾಗುವ ವೇಳೆಗೆ ಆವಿಯಾಗಿದ್ದೆ!

* ನಾಳೆಯ ಬೆಳಕಿಗಾಗಿ ಹಂಬಲಿಸುತ್ತಾ… ಹಂಬಲಿಸುತ್ತಾ … ಕುರುಡನಾಗಿಬಿಟ್ಟೆ!

* ಹರಿದರಿದ ಸೆರಗಿನೊಳಗೆ ಚಿಂದಿಯಾಗದಿರಲಿ ಬದುಕು…

* ಮೆಲು ಮಾತುಗಳ ಮೃದುತನದಲಿ ಬೆನ್ನು ಸೇರಿದ ಕತ್ತಿಯಿಂದ ಸುರಿಯಲಿಲ್ಲ ರಕ್ತ!

* ಶಾಲೆಯ ಮೈದಾನ, ಸಿಹಿ ನೀರಿನ ಬಾವಿಯ ದಂಡೆ, ಬತ್ತದ ಗದ್ದೆಯ ಕಾಲುರಸ್ತೆಗಳಲ್ಲೆಲ್ಲ ಅವಳದೇ ನಗೆಯ ಕಲವರ; ಎಲ್ಲಡಗಿಹುದೀಗ?!

– ವೀರಣ್ಣ ಕಮ್ಮಾರ


ಮನುಷ್ಯ

ಫೆಬ್ರವರಿ 25, 2009


ಮನುಷ್ಯ!

ಬೆಳಕ ಬೆಳದೂ
ಹೊಳೆ ಜಳಕ ಮಾಡಿಯೂ
ಹೊಳೆ ಹೊಳೆಯುತ
ಹಳೆದಾಗುತ, ಹಳತಾಗುತ
ನಡೆವ ಯಂತ್ರವಿದು!

– ವೀರಣ್ಣ ಕಮ್ಮಾರ